ឆ្មក់ពិន័យមិនលើកលែង! រថយន្តដឹកលើសទម្ងន់ ៧គ្រឿង ជាប់អន្ទាក់ក្រុមចល័តក្រសួងនៅខេត្តក្រចេះ (ក្រចេះ)៖ ក្នុងយុទ្ធនាការពង្រឹងការអនុវត្តច្បាប់ដឹកជញ្ជូនផ្លូវគោក ក្រុមការងារចល័តចម្រុះរបស់ក្រសួងសាធារណការ និងដឹកជញ្ជូន បានចុះឆ្មក់ត្រួតពិនិត្យ និងរកឃើញយានយន្តដឹកជញ្ជូនលើសទម្ងន់កម្រិតកំណត់ចំនួន ៧គ្រឿង នៅក្នុងខេត្តក្រចេះ ដោយត្រូវបានផាកពិន័យតាមច្បាប់យ៉ាងម៉ឺងម៉ាត់។ ប្រតិបត្តិការនេះធ្វើឡើងចាប់ពីថ្ងៃទី១៤ ដល់ថ្ងៃទី១៥ ខែមិថុនា ឆ្នាំ២០២៦ ក្រោមការដឹកនាំ និងចង្អុលបង្ហាញពីថ្នាក់ដឹកនាំជំនាញ ព្រមទាំងមានការសហការជាមួយស្ថានីយជញ្ជីងកាំពី និងស្ថានីយជញ្ជីងមានជ័យ។ លទ្ធផលត្រួតពិនិត្យបានបង្ហាញថា រថយន្តទាំង ៧គ្រឿង បានដឹកលើសទម្ងន់អនុញ្ញាតចន្លោះពី ១៩តោន ដល់ ២៦តោន ដែលជាកម្រិតខ្ពស់គួរឱ្យព្រួយបារម្ភ និងអាចបង្កការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធផ្លូវ និងស្ពានរបស់ជាតិ។ ការដឹកជញ្ជូនលើសទម្ងន់ មិនត្រឹមតែជាការរំលោភច្បាប់ប៉ុណ្ណោះទេ ប៉ុន្តែថែមទាំងជាបន្ទុកធ្ងន់លើថវិការដ្ឋក្នុងការជួសជុលផ្លូវថ្នល់ដែលរងការខូចខាតជាបន្តបន្ទាប់។ ប្រជាពលរដ្ឋជាច្រើនបានគាំទ្រចំណាត់ការដ៏ម៉ឺងម៉ាត់នេះ និងស្នើឱ្យអាជ្ញាធរបន្តអនុវត្តច្បាប់ឱ្យបានស្មើភាព ដោយមិនត្រូវមានការយោគយល់ចំពោះអ្នកល្មើសឡើយ។ ក្រសួងសាធារណការ និងដឹកជញ្ជូន ក៏បានអំពាវនាវដល់ម្ចាស់ក្រុមហ៊ុនដឹកជញ្ជូន ម្ចាស់យានយន្ត និងអ្នកបើកបរទាំងអស់ ឱ្យគោរពច្បាប់ និងអនុវត្តតាមតម្រាយផ្លូវដែលបានកំណត់ ដើម្បីរួមចំណែកថែរក្សាផ្លូវថ្នល់ ស្ពាន និងសុវត្ថិភាពសាធារណៈ។ សារព្រមានច្បាស់ៗ៖ ក្រុមការងារចល័តនឹងបន្តចុះឆ្មក់ត្រួតពិនិត្យទូទាំងប្រទេស និងអនុវត្តវិធានការតឹងរ៉ឹងបំផុតចំពោះរថយន្តដឹកលើសទម្ងន់ ដោយគ្មានការលើកលែង ដើម្បីការពារទ្រព្យសម្បត្តិសាធារណៈ និងធានាការប្រើប្រាស់ផ្លូវថ្នល់ប្រកបដោយគុណភាព និងសុវត្ថិភាពសម្រាប់ប្រជាពលរដ្ឋទាំងអស់។