(កណ្ដាល)៖ នាថ្ងៃព្រហស្បតិ៍ ទី១៨ ខែមិថុនា ឆ្នាំ២០២៦ លោក ចាប ច័ន្ទវិទ្យា អភិបាល នៃគណៈអភិបាលស្រុកលើកដែក បានអញ្ជើញចូលរួមជាអធិបតីភាពក្នុងពិធីបើកការដ្ឋានជួសជុលផ្លូវចាក់បេតុងអាមេ មួយខ្សែ ស្ថិតនៅក្នុងភូមិព្រែកតូច ឃុំព្រែកដាច់ ស្រុកលើកដែក ខេត្តកណ្ដាល។ គម្រោងជួសជុលផ្លូវនេះ មានប្រវែងសរុប ១,២៩៥ម៉ែត្រ និងទទឹង ៦ម៉ែត្រ ដែលអនុវត្តក្រោមថវិកាមូលនិធិស្រុក ឆ្នាំ២០២៦ ក្នុងគោលបំណងពង្រឹងគុណភាពហេដ្ឋារចនាសម្ព័ន្ធ ផ្តល់ភាពងាយស្រួលដល់ការធ្វើដំណើរ ការដឹកជញ្ជូនកសិផល និងការប្រកបរបររកស៊ីប្រចាំថ្ងៃរបស់ប្រជាពលរដ្ឋនៅក្នុងមូលដ្ឋាន។ ក្នុងឱកាសនោះ លោកអភិបាលស្រុក បានគូសបញ្ជាក់ថា ការអភិវឌ្ឍហេដ្ឋារចនាសម្ព័ន្ធផ្លូវថ្នល់ គឺជាកត្តាស្នូលមួយក្នុងការជំរុញកំណើនសេដ្ឋកិច្ចមូលដ្ឋាន និងលើកកម្ពស់ជីវភាពរស់នៅរបស់ប្រជាពលរដ្ឋ។ ទន្ទឹមនឹងនេះ លោកក៏បានអំពាវនាវឱ្យប្រជាពលរដ្ឋចូលរួមថែរក្សា និងប្រើប្រាស់សមិទ្ធផលសាធារណៈឱ្យបានគង់វង្ស ដើម្បីជាប្រយោជន៍រួមរយៈពេលយូរអង្វែង។ គម្រោងនេះ ស្ថិតក្នុងក្របខណ្ឌយុទ្ធសាស្ត្រអភិវឌ្ឍន៍មូលដ្ឋានរបស់រដ្ឋបាលស្រុកលើកដែក ដែលផ្តោតលើការកែលម្អហេដ្ឋារចនាសម្ព័ន្ធ និងបង្កើនគុណភាពសេវាសាធារណៈ ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ៕