(កណ្ដាល)៖ ក្រុមការងារបច្ចេកទេសធ្វើផ្លូវ នៃមន្ទីរសាធារណការ និងដឹកជញ្ជូនខេត្តកណ្ដាល នាថ្ងៃទី១៩ ខែមិថុនា ឆ្នាំ២០២៦នេះ បានឆ្លៀតពេលពីការមមាញឹក និងស្ថាបនាលូដែលជាការងារស្នូលរបស់ក្រុមខ្លួន មកជួសជុលចាក់បំពេញជង្ហុក ដែលពលរដ្ឋស្នើសុំឲ្យជួយ។ ជង្ហុកធំៗដែលបង្កគ្រោះថ្នាក់ដល់អ្នកដំណើរ និងសិស្សសាលានោះ ស្ថិតនៅលើផ្លូវ២១A ទល់មុខវត្តព្រែកសំរោង។ មហាជនបានថ្លែងអំណរគុណចំពោះការយកចិត្តទុកដាក់មួយនេះ និងក៏ស្នើសុំឲ្យមើលទៅលើបច្ចេកទេសនេះ គ្រប់ទីតាំង គ្រប់ផ្លូវដែលក្រុមការងារ បានកាយផ្លូវដាក់លូផង ព្រោះរដូវភ្លៀងមកដល់បែបនេះ ជង្ហុកមួយចំនួនធំមានភាពជ្រៅៗ ដែលបង្កឲ្យពលរដ្ឋលំបាកធ្វើដំណើរ។ សូមជម្រាបថា មន្ទីរសាធារណការ និងដឹកជញ្ជូនខេត្តកណ្ដាល បានធ្វើការកែសម្រួលប្រព័ន្ធលូរំដោះទឹកឡើងវិញទូទាំងក្រុងតាខ្មៅ ដែលសកម្មភាពការងារនេះមានភាពសស្រាក់សស្រាំ ហើយក្រុមការងារបានធ្វើការលើរឿងនេះទាំងយប់ទាំងថ្ងៃ ខណៈដែលចន្លោះប្រហោងមានតិចតួច។ ពលរដ្ឋស្នើសុំដោយសារតែពួកគេធ្លាប់រងគ្រោះដួលម៉ូតូជាបន្តបន្ទាប់ មិនមានចេតនាក្នុងការស្ដីបន្ទោសបង្អាប់អ្វីឡើយ មានតែអរគុណចំពោះការយកចិត្តទុកដាក់ចំពោះការធ្វើប្រព័ន្ធលូនេះ ក៍ព្រោះតែកន្លងទៅ ឲ្យតែភ្លៀងខ្លាំងម្ដងៗ ក្រុងតាខ្មៅស្ទើរតែក្លាយជាទន្ល លិចលង់រាប់ម៉ោងទម្រាំស្រកទឹកអស់៕