កិច្ចប្រជុំបូកសរុបរបាយការណ៍បេសកកម្មដំបូង របស់ធនាគារពិភពលោក សម្រាប់គាំទ្រការអនុវត្តគម្រោងការតភ្ជាប់ហេដ្ឋារចនាសម្ព័ន្ធក្នុងព្រះរាជាណាចក្រកម្ពុជា (CRCI) ដំណាក់កាលទី១ ភ្នំពេញ៖ នាថ្ងៃសុក្រ ទី១៩ ខែមិថុនា ឆ្នាំ២០២៦ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញជួបប្រជុំជាមួយលោក Sadig Aliyev មន្ត្រីជំនាញជាន់ខ្ពស់ផ្នែកដឹកជញ្ជូន (TL, Lead transport specialist) នៃធនាគារពិភពលោក(World Bank) ស្ដីពីការបូកសរុបរបាយការណ៍បេសកកម្មដំបូង របស់ធនាគារពិភពលោក (WB) សម្រាប់គាំទ្រការអនុវត្តគម្រោងការតភ្ជាប់ហេដ្ឋារចនាសម្ព័ន្ធក្នុងព្រះរាជាណាចក្រកម្ពុជា (CRCI) ដំណាក់កាលទី១ ដោយមានការអញ្ជើញចូលរួមពីថ្នាក់ដឹកនាំក្រសួង ក្រុមការងារអ្នកជំនាញរបស់ធនាគារពិភពលោក តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងពាណិជ្ជកម្ម និងសមាជិក សមាជិកាគម្រោងជាច្រើនរូប។ គោលបំណងកិច្ចប្រជុំនេះ គឺដើម្បីធ្វើការបូកសរុប លើការងារបច្ចេកទេសនានាគាំទ្រការអនុវត្តគម្រោងដែលបានចាប់ផ្តើមពីថ្ងៃទី១៥ ដល់១៧ និង១៩ ខែមិថុនា ឆ្នាំ២០២៦ របស់ធនាគារពិភពលោក(WB) និងការផ្ដល់នូវធាតុចូលសំខាន់ៗ ព្រមទាំងដំណោះស្រាយ អំពីនីតិវីធីនិងផែនការសកម្មភាពនានាលើការរៀបចំដំណើរការគ្រប់គ្រងផ្នែកហិរញ្ញវត្ថុ ការងារលទ្ធកម្ម ការងារបរិស្ថាននិងសង្គម ការកំណត់ផែនការសកម្មភាព រួមទាំងការងារសំខាន់ៗពាក់ព័ន្ធគម្រោង ដើម្បីពន្លឿនការរៀបចំ និងការអនុវត្តការងារនាពេលខាងមុខនេះឱ្យបានទាន់ពេលវេលា និងមានប្រសិទ្ធភាព។ នាឱកាសនោះ ឯកឧត្តរដ្ឋលេខាធិការ និងជានាយកគម្រោង ក៏បានថ្លែងអំណរគុណចំពោះ មន្ត្រីជំនាញ និងក្រុមការងារធនាគារពិភពលោក ដែលបានផ្ដល់ជំនួយគាំទ្រគម្រោងនិងផ្នែកបច្ចេកទេស ការចូលរួមសហការគ្នាយ៉ាងយកចិត្តទុកដាក់និងការបន្តកិច្ចសហការគ្នាបន្ថែមទៀត កាន់តែមានភាពច្បាស់លាស់ គ្រប់ជ្រុងជ្រោយ និងត្រឹមត្រូវតាមលក្ខណៈបច្ចេកទេស ដែលបានរួមចំណែកយ៉ាងសំខាន់ក្នុងការជួយពន្លឿនការអនុវត្តគម្រោងនេះ ទាន់ពេលវេលា ប្រកបដោយប្រសិទ្ធភាព ស្របតាមផែនការដែលបានគ្រោងទុក៕