កិច្ចប្រជុំអន្តរក្រសួងចង្អៀតដើម្បីពិនិត្យ និងពិភាក្សាបន្តលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់ ទីស្ដីការគណៈរដ្ឋមន្រ្តី៖ នាថ្ងៃពុធ ទី១៧ ខែមិថុនា ឆ្នាំ២០២៦ ឯកឧត្តម ប៉ាល់ ចន្ទតារា រដ្ឋលេខាធិការ និងជាប្រធានក្រុមការងារ បានដឹកនាំប្រតិភូ និងមន្ត្រីជំនាញនៃក្រសួងសាធារណការ និងដឹកជញ្ជូន ចូលរួមកិច្ចប្រជុំអន្តរក្រសួងចង្អៀតដើម្បីពិនិត្យ និងពិភាក្សាបន្តលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់ ក្រោមអធិបតីភាពសហប្រធាន ឯកឧត្តម អ៊ឹង សេរីវិសុទ្ធ អនុប្រធាន និងជាប្រធានក្រុមការងារទី១ នៃក្រុមប្រឹក្សាអ្នកច្បាប់ និង ឯកឧត្ដម ថេង សុីធឿន សមាជិកអចិន្ត្រៃយ៍ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាង ឯកឧត្តម នៅ បោនន័រ អនុប្រធាន និងជាប្រធានក្រុមការងារទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ តំណាងក្រសួង ស្ថាប័នពាក់ព័ន្ធ សមាជិកក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ គណកម្មការភាសាវិទ្យាខ្មែរ និងឯកឧត្តម លោកជំទាវជាថ្នាក់ដឹកនាំនិងមន្ត្រីជំនាញនៃទីស្តីការគណៈរដ្ឋមន្ត្រី។ កិច្ចប្រជុំរៀបចំឡើងក្នុងគោលបំណងដើម្បីបន្តពិនិត្យ ពិភាក្សា ផ្លាស់ប្តូរយោបល់ និងកែសម្រួលលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់ សំដៅធ្វើឱ្យសេចក្តីព្រាងអនុក្រឹត្យនេះមានខ្លឹមសារគ្រប់ជ្រុងជ្រោយ និងមានសង្គតិភាពទៅនឹងច្បាប់ និងលិខិតបទដ្ឋានគតិយុត្តពាក់ព័ន្ធ ដើម្បីកំណត់យន្តការ និងវិធានការលើការប្រើប្រាស់ដីចំណីផ្លូវ និងរក្សាបាននូវសុវត្ថិភាពចរាចរណ៍ សណ្តាប់ធ្នាប់សាធារណៈ ព្រមទាំងកាត់បន្ថយឧបសគ្គដែលរាំងស្ទះដល់ការអភិវឌ្ឍ និងការថែទាំងផ្លូវ។ ក្រោយពីបានពិនិត្យ ពិភាក្សា និងផ្លាស់ប្តូរយោបល់យ៉ាងយកចិត្តដាក់ លើគ្រប់ទិដ្ឋភាពរួចមក អង្គប្រជុំបានសម្រេចឯកភាព ដូចខាងក្រោម៖ (១). កែសម្រួលលើពាក្យពេចន៍និងខ្លឹមសារមួយចំនួននៃសេចក្តីព្រាងអនុក្រឹត្យ និង (២). បន្តកិច្ចប្រជុំអន្តរក្រសួងចង្អៀតដើម្បីពិនិត្យជំពូកអន្តរប្បញ្ញត្តិ និងខ្លឹមសារពាក់ព័ន្ធនឹងការផ្តល់ឆន្ទានុសិទ្ធិជូនរាជរដ្ឋាភិបាលលើការងារពាក់ព័ន្ធដីចំណីផ្លូវថ្នល់ក្នុងករណីចាំបាច់ ព្រមទាំងសទ្ទានុក្រម នាពេលក្រោយ តាមការជូនដំណឹងរបស់ទីស្តីគណៈរដ្ឋមន្ត្រី៕