កិច្ចប្រជុំបេសកកម្មគាំទ្រការអនុវត្តគម្រោងលើកទី៦ នៃគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក ក្រោមក្របខណ្ឌហិរញ្ញប្បទានរបស់ធនាគារពិភពលោក ភ្នំពេញ៖ ថ្ងៃទី១៥ ខែមិថុនា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំក្រុមការងារគម្រោង ចូលរួមក្នុងកិច្ចប្រជុំអន្តរក្រសួងស្តីពី បេសកកម្មគាំទ្រការអនុវត្តគម្រោងលើកទី៦ នៃគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក ក្រោមក្របខណ្ឌហិរញ្ញប្បទានរបស់ World Bank ដែលបានប្រព្រឹត្តទៅនៅទីស្តីការក្រសួងមហាផ្ទៃ។ កិច្ចប្រជុំនេះ មានការចូលរួមពីឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល និងជានាយកគម្រោង (PMU-MOI) ព្រមទាំងឯកឧត្តម លោកជំទាវ សមាជិក សមាជិកា តំណាងពីក្រសួងមហាផ្ទៃ ក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ រដ្ឋបាលថ្នាក់ក្រោមជាតិ និងអង្គភាពពាក់ព័ន្ធផ្សេងៗទៀត។ ជាមួយគ្នានេះ ក៏មានការចូលរួមពីលោកស្រី Katelijn Van den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមបេសកកម្មរបស់ World Bank ផងដែរ។ គោលបំណងនៃកិច្ចប្រជុំនេះ គឺដើម្បីពិនិត្យ និងពិភាក្សាអំពីវឌ្ឍនភាពនៃការអនុវត្តគម្រោង ព្រមទាំងបញ្ហាប្រឈមនានារបស់អង្គភាពអនុវត្តគម្រោងរបស់ក្រសួងសាធារណការ និងដឹកជញ្ជូន។ គិតត្រឹមដំណាច់ខែឧសភា ឆ្នាំ២០២៦ ការអនុវត្តគម្រោងសម្រេចបានលទ្ធផលសរុបប្រមាណ ២៦% ហើយកិច្ចប្រជុំក៏បានលើកឡើងអំពីទិសដៅបន្ត ដើម្បីជំរុញការអនុវត្តគម្រោងសាងសង់ទីលានទុកដាក់សំរាម ឱ្យទទួលបានលទ្ធផលកាន់តែប្រសើរឡើងបន្ថែមទៀត៕