(ភ្នំពេញ)៖ ឯកឧត្ដម ផន រឹម អ្នកនាំពាក្យ និងជាអនុរដ្ឋលេខាធិការក្រសួងសាធារណការ និងដឹកជញ្ជូន បានប្រកាសយ៉ាងច្បាស់តាមរយៈហ្វេសប៊ុក នៅថ្ងៃទី១៥ ខែមិថុនា ឆ្នាំ២០២៦នេះ ថា ម្ចាស់យានយន្តទាំងអស់ដែលកំពុងប្រើប្រាស់ ឬបំពាក់ផ្លាកលេខក្នុងទម្រង់មិនត្រឹមត្រូវ មិនស្របតាមលក្ខណៈបច្ចេកទេស ឬផ្ទុយពីស្មារតីអនុក្រឹត្យជាធរមាន ត្រូវដោះចេញជាបន្ទាន់ និងទៅចុះបញ្ជីបំពាក់ផ្លាកលេខស្របច្បាប់ឱ្យបានត្រឹមត្រូវ។ ការព្រមាននេះ ត្រូវបានគេចាត់ទុកថា ជាសារដ៏ម៉ឺងម៉ាត់មួយរបស់រាជរដ្ឋាភិបាល ក្នុងការពង្រឹងការអនុវត្តច្បាប់ចរាចរណ៍ផ្លូវគោក និងការគ្រប់គ្រងអត្តសញ្ញាណយានយន្តឱ្យមានស្តង់ដារតែមួយទូទាំងប្រទេស ដើម្បីបង្កើនសណ្ដាប់ធ្នាប់ សុវត្ថិភាព និងភាពងាយស្រួលក្នុងការស្រាវជ្រាវបទល្មើសផ្សេងៗ។ ឯកឧត្ដម ផន រឹម បានបញ្ជាក់ថា ក្នុងករណីម្ចាស់រថយន្តនៅតែបន្តប្រើប្រាស់ផ្លាកលេខខុសច្បាប់ ឬមិនព្រមកែតម្រូវឱ្យស្របតាមបទប្បញ្ញត្តិជាធរមាន ក្រសួងសាធារណការ និងដឹកជញ្ជូន រួមជាមួយសមត្ថកិច្ចពាក់ព័ន្ធ នឹងចាត់វិធានការតាមផ្លូវច្បាប់ដោយគ្មានការលើកលែង។ មតិសាធារណជនជាច្រើនបានស្វាគមន៍ចំណាត់ការនេះ ដោយយល់ថា ការប្រើប្រាស់ផ្លាកលេខក្លែងក្លាយ ផ្លាកលេខកែច្នៃ ឬផ្លាកលេខមិនស្របតាមការចុះបញ្ជី បានបង្កឱ្យមានភាពអនាធិបតេយ្យ និងជាឧបសគ្គដល់ការអនុវត្តច្បាប់របស់សមត្ថកិច្ចនាពេលកន្លងមក។ ប្រជាពលរដ្ឋក៏បានអំពាវនាវឱ្យម្ចាស់យានយន្តទាំងអស់ ចូលរួមគោរពច្បាប់ និងបំពេញកាតព្វកិច្ចរបស់ខ្លួនឱ្យបានត្រឹមត្រូវ ដើម្បីរួមចំណែកលើកកម្ពស់វប្បធម៌គោរពច្បាប់ សណ្ដាប់ធ្នាប់សាធារណៈ និងសុវត្ថិភាពចរាចរណ៍នៅកម្ពុជា៕