ឯកឧត្តម សុខ លូ អភិបាលខេត្តបាត់ដំបង បានដឹកនាំក្រុមការងារបច្ចេកទេស ចុះត្រួតពិនិត្យវឌ្ឍនភាពការងារស្ថាបនាផ្លូវ និងការដាក់ប្រព័ន្ធលូ នៅតាមការដ្ឋានមួយចំនួនក្នុងក្រុងបាត់ដំបង កាលពីថ្ងៃទី១៤ ខែមិថុនា ឆ្នាំ២០២៦ ។ ឯកឧត្តម បញ្ជាក់ថា បើទោះបីជាស្ថិតក្នុងរដូវវស្សាដែលមានភ្លៀងធ្លាក់ក៏ដោយ ក៏គ្រឿងចក្រនិងក្រុមការងារជំនាញ កំពុងសម្រុកធ្វើសកម្មភាពយ៉ាងមមាញឹក ដើម្បីឱ្យទាន់ផែនការ ។ គម្រោងហេដ្ឋារចនាសម្ព័ន្ធដែលកំពុងដំណើរការនេះ រួមមានការស្ថាបនាផ្លូវបេតុង ផ្លូវកៅស៊ូប្រភេទ DBST និងការរៀបចំប្រព័ន្ធលូរំដោះទឹក គ្របដណ្តប់លើភូមិសាស្ត្រសង្កាត់ចំនួន៤ គឺ សង្កាត់ចំការសំរោង សង្កាត់ស្លាកែត សង្កាត់វត្តគរ និងសង្កាត់អូរចារ ។ កំណាត់ផ្លូវទាំងនេះត្រូវបានចាប់ផ្តើមបើកការដ្ឋានស្ថាបនាឡើងវិញ ក្រោយពេលដែលអាជ្ញាធរខេត្ត បានបើកយុទ្ធនាការរំដោះចំណីផ្លូវសាធារណៈរបស់រដ្ឋដោយជោគជ័យ ។ យុទ្ធនាការនេះទទួលបានការចូលរួម និងគាំទ្រយ៉ាងផុសផុលពីសំណាក់បងប្អូនប្រជាពលរដ្ឋ ដែលព្រមលះបង់ផលប៉ះពាល់ផ្សេងៗ ធ្វើឱ្យផ្លូវដែលសាងសង់ថ្មីនេះ មានសភាពធំទូលាយជាងផ្លូវចាស់ បង្កលក្ខណៈងាយស្រួល និងសុវត្ថិភាពខ្ពស់ក្នុងការធ្វើដំណើរ ។ ឯកឧត្តម សុខ លូ បានបញ្ជាក់ថា ក្រោយការសាងសង់រួចរាល់ អាជ្ញាធរមានគម្រោងរៀបចំដាំដើមឈើ និងបំពាក់ភ្លើងបំភ្លឺផ្លូវដើរដោយថាមពលព្រះអាទិត្យ នៅតាមដងផ្លូវទាំងនោះបន្ថែមទៀត ។ វិធានការនេះ ធ្វើឡើងដើម្បីធានាសុខសុវត្ថិភាពជូនប្រជាពលរដ្ឋនាពេលរាត្រី ព្រមទាំងលើកកម្ពស់សោភ័ណភាពបរិស្ថានបៃតងក្នុងក្រុងបាត់ដំបង សំដៅទាក់ទាញភ្ញៀវទេសចរកាន់តែច្រើន។ តាងនាមឱ្យរដ្ឋបាលខេត្ត និងប្រជាពលរដ្ឋទូទាំងខេត្តបាត់ដំបង ឯកឧត្តមអភិបាលខេត្ត ក៏បានថ្លែងអំណរគុណ ចំពោះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់គម្រោងហេដ្ឋារចនាសម្ព័ន្ធផ្លូវទាំងនេះ តាមរយៈរដ្ឋបាលខេត្ត ដែលនេះជាកាដូ និងជាចំណងដៃដ៏ថ្លៃថ្លាបំផុតសម្រាប់ប្រជាពលរដ្ឋក្រុងបាត់ដំបង៕