រថយន្តធំៗ ប្រភេV1 ដឹកខ្សាច់មួយចំនួននៅក្នុងក្រុងក្រចេះ ខេត្តក្រចេះ នៅតែបន្តធ្វើសកម្មភាពដឹកជញ្ជូនលើសទម្ងន់កំណត់ បើទោះបីជាអាជ្ញាធរខេត្តក្រចេះ និងមន្ត្រីជំនាញខេត្ត ចុះត្រួតពិនិត្យ និងផាកពិន័យជាបន្តបន្ទាប់ក៏ដោយ។សកម្មភាពនេះ ត្រូវបានគេមើលឃើញថា អាចបង្កឲ្យប៉ះពាល់យ៉ាងធ្ងន់ធ្ងរដល់ហេដ្ឋារចនាសម្ព័ន្ធផ្លូវថ្នល់ដែលទើបស្ថាបនារួចរាល់ថ្មីៗក្នុងក្រុងក្រចេះ ពោលគឺមហាវិថីសម្តេចតេជោ ហ៊ុន សែន ចាប់ពីរង្វង់មូលព្រាបសរ ដល់រង្វង់មូលខ្លាស្ទុះ ជាពិសេសផ្លូវជាតិលេខ ៧ ក្រចេះ- ស្នួល ដែលកំពុងតែរងការខូចខាតផងដែរ។នាថ្ងៃទី១២ ខែមិថុនា ឆ្នាំ២០២៦ មន្ត្រីស្ថានីយជញ្ជីងអចល័តកាំពីរ ខេត្តក្រចេះ បានឃាត់រថយន្ត ដឹកខ្សាច់មួយគ្រឿង ស្ថិតនៅក្នុងសង្កាត់អូរឫស្សី ក្រុងក្រចេះ ខេត្តក្រចេះ ដោយសង្ស័យថាបានដឹកលើសទម្ងន់កំណត់ តែងតែធ្វើសកម្មភាពដឹកជញ្ជូន នាពេលពាក់កណ្ដាលយប់។ លោក សាំង ប៊ុនថេន ប្រធានមន្ទីរសាធារណការ និងដឹកជញ្ជូនខេត្តក្រចេះ បានឱ្យដឹងថា ករណីនេះប្រសិនបើម្ចាស់រថយន្តសហការជាមួយសមត្ថកិច្ច នោះរថយន្តនឹងត្រូវនាំយកទៅថ្លឹងនៅស្ថានីយជញ្ជីងអចល័តកាំពីរ ដើម្បីកំណត់ទម្ងន់ជាក់ស្តែង។ ប៉ុន្តែក្នុងករណីម្ចាស់រថយន្តមិនសហការ អាជ្ញាធរនឹងស្នើសុំជញ្ជីងចល័តពីក្រសួងសាធារណការ និងដឹកជញ្ជូន ដើម្បីចុះថ្លឹងនៅទីតាំងកើតហេតុដោយផ្ទាល់៕