សិក្ខាសាលាស្តីពី "ការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តី" ជូនដល់ថ្នាក់ដឹកនាំ មន្រ្តីរាជការក្រោមឱវាទក្រសួង និងមន្ទីរសាធារណការ និងដឹកជញ្ជូន ទាំង២៥ រាជធានី-ខេត្ត ទីស្តីការក្រសួង៖ នាព្រឹកថ្ងៃចន្ទ ទី១៥ ខែមិថុនា ឆ្នាំ២០២៦ ឯកឧត្តម តាំង សាមឿន អនុរដ្ឋលេខាធិការ តំណាង ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន ទទួលបន្ទុកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីសិក្ខាសាលាស្តីពី "ការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តី"។ កម្មវិធីនេះត្រូវបានផ្ដល់កិត្ដិយសអញ្ជើញធ្វើជាវាគ្មិនពីសំណាក់ កញ្ញា សាន សុជាតា ទីប្រឹក្សាជាន់ខ្ពស់ នៃអង្គការមូលនិធិអាស៊ី (TAF) លោកស្រី លឹម គីមអ៊ី ប្រធានការិយាល័យ នៃនាយកដ្ឋានសហប្រតិបត្តិការអន្តរជាតិ និងកញ្ញា អ៊ុក លីណា ប្រធានផ្នែកច្បាប់ និងប្រតិបត្តិតាម នៃក្រុមហ៊ុន ទីតានុ ស្តូន ឡាយហ៍ អ៊ីនសួរេន និងមានការចូលរួមពី ថ្នាក់ដឹកនាំ មន្រ្តីរាជការក្រោមឱវាទក្រសួង និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត សរុបប្រមាណ ១៣០នាក់។ សិក្ខាសាលានេះត្រូវបានរៀបចំក្នុងគោលបំណង ដើម្បីពង្រឹងសមត្ថភាពបន្ថែម ក៏ដូចជាផ្តល់នូវទស្សនទានថ្មីមួយទៀត ជូនដល់មន្ត្រីរាជការទាំងអស់ក្រោមឱវាទក្រសួង ឱ្យបានយល់ដឹងកាន់តែស៊ីជម្រៅ លើការលើកកម្ពស់សមភាពយេនឌ័រ តាមរយៈការបង្កើនការវិនិយោគលើសមភាពយេនឌ័រ និងការពង្រឹងភាពអង់អាចដល់ស្ត្រី និងក្មេងស្រីនៅក្នុងវិស័យសេដ្ឋកិច្ច អប់រំ សុខភាព និងការដឹកនាំសាធារណៈ ដើម្បីទាញយកអត្ថប្រយោជន៍ពីភាគលាភយេនឌ័រ បង្កលក្ខណៈអំណោយផលដល់ស្ត្រីក្នុងការប្រើប្រាស់សិទ្ធិលើការសម្រេចចិត្តអំពីផែនការគ្រួសារ ការកាត់បន្ថយភាពងាយរងគ្រោះដោយអំពើហិង្សាទាក់ទងនឹងយេនឌ័រលើស្ត្រី និងការលើកកម្ពស់ទំនាក់ទំនងអន្តរជំនាន់ផងដែរ។ បន្ថែមពីលើនេះទៀត ក៏នឹងមានការរៀបចំជាកម្មវិធីកិច្ចពិភាក្សា (Panel Discussion) លើប្រធានបទសំខាន់ស្តីពី “សមភាពយេនឌ័រក្នុងយុគ្គសម័យឌីជីថល” ផងដែរ៕