កិច្ចពិភាក្សាជាមួយក្រុមអ្នកជំនាញការ AIIB សម្រាប់បេសកកម្មរៀបចំគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែននៅកម្ពុជា (3CEP) លើកទី៦ ទីស្ដីការក្រសួង៖ នាព្រឹកថ្ងៃអង្គារ-ពុធ និងសុក្រ ទី៩-១០ និងទី១២ ខែមិថុនា ឆ្នាំ២០២៦ លោកជំទាវ ឥម នីថារ៉ា រដ្ឋលេខាធិការ និងជានាយកគម្រោង បានអញ្ជើញដឹកនាំកិច្ចប្រជុំពិភាក្សាពាក់ព័ន្ធទាំងអស់ក្នុងរយៈពេល ៣ថ្ងៃ ដើម្បីពិនិត្យ ពិភាក្សាលើវឌ្ឍនភាពការងារក្រោមក្របខ័ណ្ឌគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែននៅព្រះរាជាណាចក្រកម្ពុជា (Cambodia Cross-border Connectivity Enhancement Project, ហៅកាត់ថា 3CEP ) ជាមួយ លោក Tomás Herrero Diez តំណាងអ្នកជំនាញការធនាគារវិនិយោគហេដ្ឋារចនាសម្ព័ន្ធអាស៊ី (AIIB) ទទួលបន្ទុកប្រតិបត្តិការវិនិយោគលើវិស័យដឹកជញ្ជូន ក្នុងបេសកកម្មរៀបចំគម្រោង 3CEP លើកទី៦ របស់ក្រុមជំនាញការនៃធនាគារ AIIB មកកាន់កម្ពុជា ដោយមានការអញ្ជើញចូលរួមពី ឯកឧត្តម លោកជំទាវជាថ្នាក់ដឹកនាំគម្រោង លោកប្រធានគ្រប់គ្រងគម្រោង តំណាងមន្ទីរសាធារណការ និងដឹកជញ្ជូនខេត្តពាក់ព័ន្ធទាំង៤ (ខេត្តតាកែវ រតនគិរី ក្រចេះ និងត្បូងឃ្មុំ) និងមន្ត្រីជំនាញមកពីអគ្គនាយកដ្ឋានពាក់ព័ន្ធដែលជាសមាជិកក្នុងការអនុវត្តគម្រោង ព្រមទាំងតំណាងសម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV របស់គម្រោង 3CEP ផងដែរ។ គោលបំណងនៃបេសកកម្មលើកទី៦នេះ គឺដើម្បីត្រួតពិនិត្យវឌ្ឍនភាពសកម្មភាពការងារនៃការសិក្សាសមិទ្ធិលទ្ធភាព (Feasibility Study - FS) និងរៀបចំគំនូសប្លង់វិស្វកម្មលម្អិត (Detailed Engineering Designs - DEDs) ដោយសម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV សំដៅធ្វើយ៉ាងណាឱ្យគម្រោងនេះអាចអនុវត្តបានឆាប់ ប្រកបដោយប្រសិទ្ធភាព ដែលនឹងបម្រើដល់ការអភិវឌ្ឍសេដ្ឋកិច្ចឆ្លងកាត់ព្រំដែននៃព្រះរាជាណាចក្រកម្ពុជា ប្រកបដោយភាពធន់គ្រប់គ្រាន់ក្នុងបរិបទភូមិសាស្ត្រនយោបាយតំបន់ និងពិភពលោកកំពុងមានភាពស្រពេចស្រពិល។ ជាលទ្ធផលសម្រាប់បេសកកម្មលើកទី៦នេះ តំណាងធនាគារ AIIB បានវាយតម្លៃខ្ពស់លើកិច្ចខិតខំប្រឹងប្រែងរបស់អង្គភាពគ្រប់គ្រងគម្រោង 3CEP, សម្ព័ន្ធក្រុមហ៊ុនទីប្រឹក្សាបច្ចេកទេស KCI-BOTEK JV, និងភាគីពាក់ព័ន្ធទាំងអស់ (ទាំងថ្នាក់ជាតិ និងថ្នាក់ក្រោមជាតិ) ដែលបានអនុវត្តការងារពាក់ព័ន្ធក្នុងដំណាក់កាលសិក្សា FS និង DEDs ឱ្យទទួលបានផ្លែផ្កាគួរឱ្យកត់សម្គាល់ នូវវឌ្ឍនភាពការងាររួមមាន៖ (១)-ការបញ្ជាក់នូវស្ថានភាពទីតាំងដែលគម្រោង 3CEP គ្រោងនឹងសាង់ស្ថានីយ និងហេដ្ឋារចនាសម្ព័ន្ធច្រកទ្វារព្រំដែនអន្តរជាតិទាំង ៤កន្លែង គឺមិនមានការប៉ះពាល់ដល់ការងារខ័ណ្ឌសីមា និងការបោះបង្គោលព្រំដែន រវាងកម្ពុជា-វៀតណាមឡើយ (២)-ការងារគ្រប់គ្រងហិរញ្ញវត្ថុគម្រោង (៣)-ការងារកិច្ចលទ្ធកម្មគម្រោង (៤)-ការងារគាំទ្រដល់កិច្ចគាំពារសង្គមនិងបរិស្ថាន (៥)-ការរួមបញ្ចូលនូវការគិតគូរដល់ការប្រែប្រួលអាកាសធាតុ និងទិដ្ឋភាពពាណិជ្ជកម្មសម្រាប់គម្រោង (៦)-ការរៀបចំរបាយការណ៍ពាក់ព័ន្ធក្នុងដំណាក់កាល FS & DEDs នេះផងដែរ។ សូមបញ្ជាក់ជូនបន្ថែមថា៖ គម្រោង 3CEP នេះ នឹងប្រើប្រាស់ហិរញ្ញប្បទានសហប្រតិបត្តិការពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ដែលត្រូវបានរំពឹងទុកថា សមិទ្ធផលនៃគម្រោងនេះ នឹងជួយគាំទ្រដល់វិស័យដឹកជញ្ជូនក្នុងការពង្រឹងការតភ្ជាប់ និងជំរុញកំណើននៃរំហូរប្រតិបត្តិការដឹកញ្ជូនក្នុងតំបន់ភូមិភាគឦសាន និងឆ្លងកាត់ព្រំដែន ប្រកបដោយប្រសិទ្ធភាពនិងប្រសិទ្ធផល។ ជាពិសេស គម្រោងនេះក៏នឹងជំរុញការតភ្ជាប់ និងធ្វើឱ្យប្រសើរឡើងស្ថានីយ និងហេដ្ឋារចនាសម្ព័ន្ធច្រកទ្វារព្រំដែនអន្តរជាតិ(CBF) សម្រួលការដឹកជញ្ជូន ពាណិជ្ជកម្ម ទេសចរណ៍ឆ្លងកាត់ព្រំដែនអន្តរជាតិ និងការតភ្ជាប់សេដ្ឋកិច្ចក្នុងក្របខ័ណ្ឌ៖ (១)-កិច្ចសហប្រតិបត្តិការក្នុងមហាអនុតំបន់មេគង្គ(GMS) (២)-កិច្ចសហប្រតិបត្តិការទ្វេភាគីកម្ពុជា-វៀតណាម (៣)-ចូលរួមចំណែក អនុវត្តផែនការមេអភិវឌ្ឍតំបន់ភូមិភាគឦសាន (ប៉ូលសេដ្ឋកិច្ចទី៥) និង (៤)-អនុវត្តយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកកម្ពុជា ផងដែរ៕