ក្រុមការងារបច្ចេកទេសអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ចុះត្រួតពិនិត្យការងារដំឡើងពោងសញ្ញាជំនួយនាវាចរណ៍នៅទីតាំងទន្លេចតុមុខ ភ្នំពេញ៖ នាថ្ងៃពុធ ទី១០ ខែមិថុនា ឆ្នាំ២០២៦ ឯកឧត្តម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានដឹកនាំក្រុមការងារបច្ចេកទេសរបស់អគ្គនាយកដ្ឋាន និងដោយមានការចូលរួមពីក្រុមអ្នកជំនាញការនៃវិទ្យាស្ថានសញ្ញាជំនួយនាវាចរណ៍កូរ៉េ តំណាងមកពីកំពង់ផែស្វយ័តភ្នំពេញ តំណាងក្រុមហ៊ុនផលិតពោងសញ្ញា Woori Marine និងក្រុមហ៊ុនដំឡើងពោងសញ្ញា SBMG ចុះត្រួតពិនិត្យការងារដំឡើងពោងសញ្ញាជំនួយនាវាចរណ៍នៅទីតាំងទន្លេចតុមុខ។ សូមបញ្ជាក់ផងដែរថា ពោងសញ្ញាជំនួយនាវាចរណ៍ដែលបានដំឡើងនេះស្ថិតក្រោមកិច្ចសហប្រតិបត្តិការ និងជំនួយហិរញ្ញប្បទានពីរដ្ឋាភិបាលនៃសាធារណរដ្ឋកូរ៉េ តាមរយៈវិទ្យាស្ថានសញ្ញាជំនួយនាវាចរណ៍កូរ៉េ ក្នុងគោលបំណងធានាឱ្យបាននូវសុវត្ថិភាពក្នុងការធ្វើនាវាចរណ៍តាមផ្លូវទឹកនៅកម្ពុជា។ នៅក្នុងដំណាក់កាលទី១ នៃគម្រោង ការដំឡើងពោងសញ្ញាជំនួយនាវាចរណ៍នឹងត្រូវអនុវត្តនៅតាមបណ្តោយទន្លេមគង្គក្រោម ចាប់ពីទន្លេចតុមុខរហូត ដល់ព្រំដែនកម្ពុជាវៀតណាម៕