យោងតាមការចេញផ្សាយរបស់ក្រសួងព័ត៌មាន បានឱ្យដឹងថា ក្រសួងសាធារណការ និងដឹកជញ្ជូន កំពុងរៀបចំគម្រោងបំពាក់ប្រព័ន្ធសេនស័រ (Sensor) ទៅលើរថយន្តដឹកអ្នកដំណើរ និងរថយន្តដឹកទំនិញធុនធំ។ វិធានការនេះធ្វើឡើងដើម្បីជួយត្រួតពិនិត្យ និងគ្រប់គ្រងអ្នកបើកបរកុំឱ្យបញ្ជារថយន្តលើសល្បឿនកំណត់ សំដៅចូលរួមកាត់បន្ថយអត្រាគ្រោះថ្នាក់ចរាចរណ៍នៅកម្ពុជា។ការបញ្ជាក់នេះត្រូវបានលើកឡើងដោយ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ក្នុងអំឡុងពេលចុះយុទ្ធនាការអប់រំផ្សព្វផ្សាយពីសុវត្ថិភាពចរាចរណ៍ នៅតាមបណ្ដោយផ្លូវជាតិលេខ៦A ក្នុងស្រុកមុខកំពូល ខេត្ដកណ្ដាល កាលពីថ្ងៃទី៧ ខែមិថុនា ឆ្នាំ២០២៦។ចំណុចសំខាន់ៗនៃគម្រោងបំពាក់ Sensor នេះរួមមាន៖ ការគ្រប់គ្រងល្បឿនតាមប្រព័ន្ធបច្ចេកវិទ្យា៖ នៅពេលដែលអ្នកបើកបរបញ្ជារថយន្តលើសល្បឿនកំណត់ ប្រព័ន្ធ Sensor នឹងលោតសញ្ញាផ្តល់ដំណឹងភ្លាមៗ ដែលអនុញ្ញាតឱ្យក្រុមហ៊ុនអាចចាត់វិធានការផ្ទាល់តែម្តងទៅលើអ្នកបើកបរនោះ។ កិច្ចសហការ និងការជ្រើសរើសបច្ចេកវិទ្យា៖ ឯកឧត្តមរដ្ឋមន្ត្រីបានបញ្ជាក់ថា ក្រសួង និងបណ្តាក្រុមហ៊ុនដឹកជញ្ជូន បានជួបពិភាក្សា និងឯកភាពគ្នាជាគោលការណ៍រួចរាល់ហើយ។ បច្ចុប្បន្ន ភាគីពាក់ព័ន្ធកំពុងស្ថិតក្នុងដំណាក់កាលសិក្សាពិចារណាជ្រើសរើសបច្ចេកវិទ្យាសមស្រប ដែលមានជម្រើសពីប្រទេសចិន សហរដ្ឋអាមេរិក និងអឺរ៉ុប។ទាក់ទិននឹងស្ថានភាពគ្រោះថ្នាក់ចរាចរណ៍នៅកម្ពុជា ឯកឧត្ដម នាយឧត្ដមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានគូសបញ្ជាក់ថា ក្នុងរយៈពេល ៥ខែ ដើមឆ្នាំ២០២៦ នេះ អត្រាគ្រោះថ្នាក់មានការកើនឡើងបន្តិចបន្តួចបើប្រៀបធៀបនឹងឆ្នាំមុន។ តួលេខបានបង្ហាញថា អត្រាអ្នកស្លាប់បានកើនឡើងប្រមាណ ១០ភាគរយ និងអ្នករបួសកើនជាង ១០០នាក់។ កំណើននេះត្រូវបានកត់សម្គាល់ថា បណ្តាលមកពីករណីគ្រោះថ្នាក់រថយន្តដឹកកម្មករនៅខេត្តកំពង់ឆ្នាំង និងខេត្តស្វាយរៀង កាលពីខែឧសភា ដែលបណ្តាលឱ្យមានអ្នកស្លាប់រហូតដល់ ១៤នាក់ និងរបួសជាង ១០០នាក់។ដើម្បីចូលរួមឆ្លើយតបនឹងបញ្ហានេះ ក្រសួង ស្ថាប័ន និងអង្គការពាក់ព័ន្ធនានា កំពុងបន្តសហការចុះអប់រំផ្សព្វផ្សាយពីច្បាប់ចរាចរណ៍ ព្រមទាំងមានការចែកមួកសុវត្ថិភាពដោយផ្ទាល់ជូនដល់ប្រជាពលរដ្ឋ ដែលធ្វើដំណើរតាមដងផ្លូវ ដើម្បីបញ្ជ្រាបការយល់ដឹងឱ្យកាន់តែទូលំទូលាយ និងធានាសុវត្ថិភាពក្នុងការធ្វើដំណើរ៕