ក្រសួងសាធារណការ ត្រៀមបំពាក់ប្រព័ន្ធ Sensor លើរថយន្តធុនធំ និងរថយន្តដឹកជញ្ជូន ដើម្បីទប់ស្កាត់ការបើកបរលើសល្បឿនកំណត់ ភ្នំពេញ៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា ក្រសួងនឹងរៀបចំបំពាក់ប្រព័ន្ធសេនសឺរ (Sensor Systems) ទៅលើរថយន្តធុនធំ ទាំងរថយន្តទេសចរណ៍ និងរថយន្តដឹកជញ្ជូនទំនិញ ដើម្បីគ្រប់គ្រង និងទប់ស្កាត់កុំឱ្យអ្នកបើកបរលើសល្បឿនកំណត់ ដែលបង្កហានិភ័យដល់គ្រោះថ្នាក់ចរាចរណ៍។ តាមរយៈបច្ចេកវិទ្យានេះ ប្រសិនបើអ្នកបើកបរល្មើសនឹងល្បឿនកំណត់ ប្រព័ន្ធសេនសឺរនឹងលោតសញ្ញាប្រកាសអាសន្នភ្លាមៗ ដែលអនុញ្ញាតឱ្យក្រុមហ៊ុនសាមីខ្លួនអាចដឹង និងមានវិធានការទប់ស្កាត់ ឬពិន័យផ្ទាល់ទៅលើអ្នកបើកបរទាំងនោះបានទាន់ពេលវេលា។ឯកឧត្តមរដ្ឋមន្ត្រីបានបញ្ជាក់បន្ថែមថា គម្រោងនៃការបំពាក់ប្រព័ន្ធសេនសឺរនេះ ត្រូវបានក្រុមហ៊ុនដឹកជញ្ជូនទំនិញ និងក្រុមហ៊ុនដឹកជញ្ជូនអ្នកដំណើរ ឯកភាពជាគោលការណ៍រួចរាល់ហើយ។ បច្ចុប្បន្ន ក្រសួងកំពុងស្ថិតក្នុងដំណាក់កាលសិក្សា និងពិនិត្យយ៉ាងលម្អិតទៅលើបច្ចេកវិទ្យា ដើម្បីធានាថាវាស្របទៅនឹងស្ថានភាពជាក់ស្តែងនៃការដឹកជញ្ជូននៅក្នុងប្រទេសកម្ពុជា ហើយក្រសួងនឹងរុញច្រានកិច្ចការងារនេះឱ្យលេចចេញជារូបរាងឡើងក្នុងពេលឆាប់ៗខាងមុខ។ជាជំហានដំបូង ក្រសួងនឹងផ្តល់អាទិភាពផ្តោតលើការសាកល្បងបំពាក់លើរថយន្តរបស់ក្រុមហ៊ុនដឹកជញ្ជូនធំៗសិន ដើម្បីវាយតម្លៃពីកម្រិតប្រសិទ្ធភាពនៃការប្រើប្រាស់ មុននឹងបន្តជំរុញការបំពាក់រថយន្តប្រភេទផ្សេងៗទៀតជាបន្តបន្ទាប់ ដូចជារថយន្តដឹកកម្មករ-កម្មការិនីនិយោជិតជាដើម៕