គម្រោងសាងសង់ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចបាន ៧៣% ហើយ ភ្នំពេញ៖ គម្រោងសាងសង់ស្ពានឆ្លងទន្លេបាសាក់ តភ្ជាប់តំបន់ចាក់អង្រែក្រោម និងព្រែកប្រា សម្រេចវឌ្ឍនភាពការងារសរុបបាន ៧៣ភាគរយ គិតត្រឹមដំណាច់ខែឧសភា ឆ្នាំ២០២៦ បន្ទាប់ពីបានបើកការដ្ឋានសាងសង់ជាផ្លូវការកាលពីថ្ងៃទី១៩ ខែកុម្ភៈ ឆ្នាំ២០២៤។ នេះបើតាមព័ត៌មានដែលក្រសួងសាធារណការ និងដឹកជញ្ជូនបានផ្សព្វផ្សាយនៅថ្ងៃទី១ ខែមិថុនា ឆ្នាំ២០២៦។ យោងតាមរបាយការណ៍វឌ្ឍនភាព គម្រោងនេះបានបញ្ចប់ការងារផ្នែកគ្រឹះស្ពាន និងរចនាសម្ព័ន្ធក្រោមស្ពានទាំងស្រុង ១០០ភាគរយ ខណៈរចនាសម្ព័ន្ធលើនៃស្ពានតភ្ជាប់ក៏សម្រេចបាន ១០០ភាគរយផងដែរ។ ចំណែករចនាសម្ព័ន្ធលើនៃស្ពានមេ សម្រេចបាន ៦៧,៣០ភាគរយ ដោយការសាងសង់ធ្នឹមប្រអប់ខាងស្តាំ និងខាងឆ្វេង កំពុងបន្តអនុវត្តតាមផែនការដែលបានកំណត់។ ដោយឡែក ការសាងសង់បណ្តាញផ្លូវតភ្ជាប់ និងផ្លូវបង្វែរទិស សម្រេចបាន ៤៨,៤ភាគរយ ក្នុងនោះផ្លូវតភ្ជាប់ប្រវែង ៨០៤,៣០ម៉ែត្រ សម្រេចបាន ៥០ភាគរយ និងផ្លូវបង្វែរទិស សម្រេចបាន ៤៦ភាគរយ។ ទន្ទឹមនឹងនេះ ការដឹកជញ្ជូនធ្នឹមស្ពានពីត្រើយខាងលិចទៅត្រើយខាងកើតចំនួន ៩៦ដើម ត្រូវបានបញ្ចប់រួចរាល់ ហើយក្រុមការងារកំពុងបន្តការងារចាក់បេតុងតភ្ជាប់មុខតំណ។ ក្រសួងសាធារណការ និងដឹកជញ្ជូន បានវាយតម្លៃខ្ពស់ចំពោះក្រុមហ៊ុនសំណង់សៀងហៃ ដែលកំពុងអនុវត្តគម្រោងនេះ ដោយគោរពតាមបទដ្ឋានបច្ចេកទេស និងលក្ខខណ្ឌកិច្ចសន្យាយ៉ាងត្រឹមត្រូវ ធានាបានទាំងគុណភាព សុវត្ថិភាព និងសោភ័ណភាពនៃសំណង់។ ជាមួយគ្នានេះ អង្គភាពគ្រប់គ្រងគម្រោងក៏កំពុងបន្តពង្រឹងវិធានការសុវត្ថិភាពការងារ ជាពិសេសក្នុងរដូវវស្សា ដែលកម្ពស់ទឹកទន្លេកំពុងកើនឡើង។ ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ត្រូវបានចាត់ទុកជាស្ពានទី៧ ឆ្លងកាត់ទន្លេបាសាក់ បន្ទាប់ពីស្ពានចំនួន៦ផ្សេងទៀតដែលបានសាងសង់រួចរួមមាន ស្ពានកោះពេជ្រ-កោះនរា ស្ពានព្រះមុនីវង្សទាំងពីរ ស្ពានសំរោង ស្ពានកោះអន្លង់ចិន និងស្ពានកោះធំ។ គម្រោងនេះត្រូវបានរំពឹងថានឹងជួយសម្រួលចរាចរណ៍ និងជំរុញការអភិវឌ្ឍសេដ្ឋកិច្ចនៅតំបន់ភាគខាងត្បូងរាជធានីភ្នំពេញឱ្យកាន់តែមានប្រសិទ្ធភាព។