កិច្ចប្រជុំជំនាញបច្ចេកទេសលើសេចក្តីព្រាងអនុក្រឹត្យស្តីពីលក្ខខណ្ឌ និងនីតិវិធីនៃការផ្ដល់លិខិតអនុញ្ញាត ឬអាជ្ញាបណ្ណប្រកបអាជីវកម្មប្រព័ន្ធទឹកកខ្វក់ ទីស្ដីការគណៈរដ្ឋមន្ត្រី៖ នាថ្ងៃអង្គារ ទី២៦ ខែឧសភា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញដឹកនាំក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ ចូលរួមកិច្ចប្រជុំជំនាញបច្ចេកទេសលើសេចក្តីព្រាងអនុក្រឹត្យស្តីពីលក្ខខណ្ឌ និងនីតិវិធីនៃការផ្ដល់លិខិតអនុញ្ញាត ឬអាជ្ញាបណ្ណប្រកបអាជីវកម្មប្រព័ន្ធទឹកកខ្វក់ ក្រោមអធិបតីភាព ឯកឧត្តម លីវ សុវណ្ណា អនុប្រធាន និងជាប្រធានក្រុមទី៤ នៃក្រុមប្រឹក្សាអ្នកច្បាប់ និង ឯកឧត្តម នៅ បោនន័រ អនុប្រធាន និងជាប្រធានក្រុមទី១នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ។ កិច្ចប្រជុំនេះមានការអញ្ជើញចូលរួមពីក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ នៃក្រសួងសាធារណការ និងដឹកជញ្ជូន ជាក្រសួងសាមីដែលជាម្ចាស់ឯកសារ និងជាម្ចាស់សំណើ ឯកឧត្តម-លោកជំទាវ លោក លោកស្រី ក្រុមការងារក្រុមប្រឹក្សាអ្នកច្បាប់ និងក្រុមការងារក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ នៃទីស្តីការគណៈរដ្ឋមន្ត្រីផងដែរ ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យពិភាក្សា ក្នុងកម្រិតជំនាញបច្ចេកទេស ពាក់ព័ន្ធនឹងខ្លឹមសារសេចក្តីព្រាងអនុក្រឹត្យ ស្តីពីលក្ខខណ្ឌ និងនីតិវិធីនៃការផ្ដល់លិខិតអនុញ្ញាត ឬអាជ្ញាបណ្ណប្រកបអាជីវកម្មប្រព័ន្ធទឹកកខ្វក់ ។ បន្ថែមពីនោះ ក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ នៃក្រសួងសាធារណការ និងដឹកជញ្ជូន នឹងរៀបចំសេចក្ដីព្រៀងអនុក្រឹតស្ដីពីការបែងចែកតួនាទីភារកិច្ចសម្ថកិច្ចអភិវឌ្ឍន៍ប្រព័ន្ធទឹកកខ្វក់ អោយសមស្របតាមមាត្រា៤ នៃច្បាប់ស្ដីពីប្រព័ន្ធទឹកកខ្វក់ និងធ្វើការត្រួតពិនិត្យលើខ្លឹមសារសេចក្តីព្រាងអនុក្រឹត្យស្តីពីលក្ខខណ្ឌ និងនីតិវិធីនៃការផ្ដល់លិខិតអនុញ្ញាត ឬអាជ្ញាបណ្ណប្រកបអាជីវកម្មប្រព័ន្ធទឹកកខ្វក់ ឱ្យមានលក្ខណៈគ្រប់ជ្រុងជ្រោយបន្ថែមទៀត ដើម្បីស្នើរៀបចំកិច្ចប្រជុំជំនាញបច្ចេកទេសពិនិត្យ និងផ្ដល់យោបល់នៅពេលខាងមុខបន្តទៀត៕