(កណ្តាល)៖ ប្រជាពលរដ្ឋរស់នៅតាមបណ្ដោយផ្លូវជាតិលេខ២១បេ ស្ថិតក្នុងភូមិថ្មី២ សង្កាត់តាខ្មៅ ក្រុងតាខ្មៅ ខេត្តកណ្ដាល បានសម្ដែងការព្រួយបារម្ភពីគុណភាពការដ្ឋានកាយផ្លូវដាក់លូ បន្ទាប់ពីមានភ្លៀងធ្លាក់មួយមេធំកាលពីយប់មិញ បណ្ដាលឲ្យទីតាំងការដ្ឋានមួយចំនួនលិចទឹក និងក្លាយជាភក់ជ្រាំ។ ប្រជាពលរដ្ឋមួយចំនួនបានលើកឡើងថា ពួកគាត់រីករាយ គាំទ្រនឹងការអភិវឌ្ឍន៍ផ្លូវ និងប្រព័ន្ធលូនោះទេ ព្រោះជាផលប្រយោជន៍សាធារណៈរយៈពេលវែង ប៉ុន្តែអ្វីដែលពួកគាត់ព្រួយបារម្ភ គឺការអនុវត្តបច្ចេកទេសសំណង់ក្រោយការដ្ឋានលិចទឹក ថាតើមានការត្រួតពិនិត្យត្រឹមត្រូវដែរឬទេ។ មិនតែប៉ុណ្ណោះ នៅព្រឹកថ្ងៃទី៨ ខែឧសភា ឆ្នាំ២០២៦នេះ ប្រជាពលរដ្ឋបានអះអាងថា ពួកគាត់បានឃើញជាក់ស្ដែង មានគ្រឿងចក្រធន់ធ្ងន់ប្រភេទរឡូ បានបើកកិនបង្ហាប់នៅលើទីតាំងដែលនៅមានទឹក និងភក់ជ្រាំនៅឡើយ ដែលធ្វើឲ្យមហាជនកាន់តែមានចម្ងល់ថា តើការអនុវត្តបច្ចេកទេសបែបនេះ អាចធានាគុណភាពផ្លូវបានដែរឬទេ។ តាមគោលការណ៍បច្ចេកទេសសំណង់ផ្លូវ បន្ទាប់ពីការដ្ឋានត្រូវទឹកលិច ឬដីជ្រាបទឹកខ្លាំង ក្រុមការងារត្រូវបូមទឹកចេញ សម្ងួតដី និងពិនិត្យស្ថានភាពដីបាតឲ្យបានច្បាស់លាស់ មុននឹងចាក់ថ្មមិច ឬកិនបង្ហាប់ជាស្រទាប់ៗ ដើម្បីធានាគុណភាព និងការប្រើប្រាស់បានយូរអង្វែង។ អ្នកជំនាញផ្នែកសំណង់មួយចំនួនលើកឡើងថា ប្រសិនបើដីនៅមានសំណើមខ្លាំង ឬមានទឹកជ្រាំ ការប្រើរឡូកិនបង្ហាប់ភ្លាមៗ អាចធ្វើឲ្យស្រទាប់ដីខាងក្រោមបាត់បង់ស្ថេរភាព និងមិនអាចបង្ហាប់បានតាមស្តង់ដារបច្ចេកទេសនោះទេ។ ប្រភពដដែលបន្តថា ប្រសិនបើការដ្ឋាននៅមានភក់ ឬដីទន់ ហើយចាក់ថ្មមិចកិនបង្ខំភ្លាមៗ ដោយមិនអនុវត្តតាមស្តង់ដារបច្ចេកទេស នោះអាចបណ្ដាលឲ្យផ្លូវឆាប់ស្រុត បែក រលាក់ ឬខូចគុណភាពនៅពេលប្រើប្រាស់នាពេលក្រោយ ជាពិសេសក្នុងរដូវវស្សា ដែលជាបញ្ហាបង្កការលំបាកដល់ការធ្វើដំណើររបស់ប្រជាពលរដ្ឋ។ ពលរដ្ឋបានស្នើឲ្យ លោករដ្ឋមន្ត្រី ប៉េង ពោធិ៍នា, លោក បូរី វង្សសានិត្យ ប្រធានមន្ទីរសាធារណការនិងដឹកជញ្ជូនខេត្តកណ្តាល,ក្រុមហ៊ុនម៉ៅការ ក៏ដូចជាមន្ត្រីជំនាញពាក់ព័ន្ធ ចុះត្រួតពិនិត្យការអនុវត្តការងារឲ្យបានម៉ត់ចត់ និងអនុវត្តតាមបទដ្ឋានបច្ចេកទេសឲ្យបានត្រឹមត្រូវ ដើម្បីធានាសុវត្ថិភាព និងគុណភាពសំណង់ ជៀសវាងការខូចខាតឆាប់រហ័សដែលអាចប៉ះពាល់ដល់ថវិការដ្ឋ និងការធ្វើដំណើររបស់ប្រជាពលរដ្ឋ។ មហាជនក៏សង្ឃឹមផងដែរថា គម្រោងអភិវឌ្ឍន៍ផ្លូវមួយនេះ នឹងបញ្ចប់ប្រកបដោយគុណភាព ស្តង់ដារ និងអាចប្រើប្រាស់បានយូរអង្វែង ដើម្បីឆ្លើយតបទៅនឹងតម្រូវការធ្វើដំណើរ និងការរីកចម្រើនរបស់ក្រុងតាខ្មៅនាពេលអនាគត៕