ប្រទេសវៀតណាមបានជម្រុញ ការតភ្ជាប់ដោយផ្ទាល់ ដែលបានស្នើឡើងនេះត្រូវបានគេរំពឹងថា នឹងធ្វើឱ្យភស្តុភារកម្មរវាងផ្លូវល្បឿនលឿនទាំងពីរមានភាពរលូន ដោយលុបបំបាត់តម្រូវការចេញទៅកាន់ផ្លូវក្នុងស្រុក និងកាត់បន្ថយពេលវេលាធ្វើដំណើរយ៉ាងច្រើន។វៀតណាមកំពុងពន្លឿនផែនការ ដើម្បីបង្កើតច្រករបៀងផ្លូវល្បឿនលឿនជាបន្តបន្ទាប់ រវាងទីក្រុងហូជីមិញ និងទីក្រុងភ្នំពេញ ខណៈការពង្រឹងទំនាក់ទំនងទ្វេភាគី និងការកើនឡើងនៃទំហំពាណិជ្ជកម្មបានបង្ហាញពីតម្រូវការ សម្រាប់ការតភ្ជាប់ឆ្លងកាត់ព្រំដែន ដែលកាន់តែលឿនជាងមុន និងមានប្រសិទ្ធភាពជាងមុន។យោងតាមរបាយការណ៍ប្រព័ន្ធផ្សព្វផ្សាយវៀតណាម អាជ្ញាធរបានស្នើផែនការពីរដំណាក់កាល ដើម្បីភ្ជាប់ផ្លូវល្បឿនលឿនទីក្រុងហូជីមិញ-ម៉ុកបៃដែលមិនទាន់អភិវឌ្ឍជាមួយ នឹងផ្លូវល្បឿនលឿនភ្នំពេញ-បាវិតរបស់កម្ពុជា។ សំណើនេះ មានគោលដៅបង្កើតការតភ្ជាប់ ផ្លូវល្បឿនលឿនឱ្យបានរលូនរវាងប្រទេសជិតខាងទាំងពីរ។ ក្រោមដំណាក់កាលទី១៖ ចរាចរណ៍ពីផ្លូវល្បឿនលឿនវៀតណាមនឹងប្រើប្រាស់ ច្រកទ្វារព្រំដែនអន្តរជាតិម៉ុកបៃ -បាវិត ដែលមានស្រាប់ជាបណ្តោះអាសន្ន ដើម្បីឆ្លងកាត់ចូលទៅក្នុងប្រទេសកម្ពុជា នៅពេលដែលផ្លូវទីក្រុងហូជីមិញ -ម៉ុកបៃចាប់ផ្តើមដំណើរការ។ ដំណោះស្រាយបណ្តោះអាសន្ននេះ នឹងអនុញ្ញាតឱ្យយានយន្ត និងទំនិញធ្វើដំណើរ ឆ្លងកាត់ហេដ្ឋារចនាសម្ព័ន្ធគយបច្ចុប្បន្ន ខណៈពេលដែលរដ្ឋាភិបាលទាំងពីរ បានបញ្ចប់នីតិវិធីបច្ចេកទេស និងផ្នែកច្បាប់សម្រាប់ការតភ្ជាប់ដោយផ្ទាល់។ ដំណាក់កាលទី២៖ ស្នើការសាងសង់ការតភ្ជាប់ផ្លូវល្បឿនលឿននៅជិតបង្គោលព្រំដែនលេខ១៧០ ដែលតម្រឹមជាមួយផ្លូវដឹកជញ្ជូនទំនិញនៅច្រកទ្វារបាវិត-ម៉ុកបៃ។ ការតភ្ជាប់ដោយផ្ទាល់ដែលបានស្នើឡើងនេះ នឹងធ្វើឱ្យការដឹកជញ្ជូន រវាងផ្លូវល្បឿនលឿនទាំងពីរមានភាពរលូន ដោយលុបបំបាត់តម្រូវការចេញ ទៅកាន់ផ្លូវក្នុងស្រុក និងកាត់បន្ថយពេលវេលាធ្វើដំណើរយ៉ាងច្រើន។ យោងតាមប្រព័ន្ធផ្សព្វផ្សាយអនឡាញ VNExpress International បានឱ្យដឹងថា ក្រសួងសំណង់វៀតណាមបានស្នើសុំការឯកភាពពីរដ្ឋាភិបាល សម្រាប់វិធីសាស្រ្តជាដំណាក់កាលនេះ និងបានអំពាវនាវឱ្យស្ថាប័នពាក់ព័ន្ធ បញ្ចប់ការរៀបចំផ្នែកបច្ចេកទេស ការទូត និងគយចាំបាច់ ដើម្បីធានាបាននូវប្រតិបត្តិការផ្លូវល្បឿនលឿនឆ្លងកាត់ព្រំដែនឱ្យបានរលូន។ នៅខាងវៀតណាម ផ្លូវល្បឿនលឿនហូជីមិញ-ម៉ុកបៃ ដែលមានប្រវែងជិត៥១គីឡូម៉ែត្រ ចាប់ផ្តើមនៅផ្លូវក្រវ៉ាត់លេខ៣ ក្នុងទីក្រុងហូជីមិញ ហើយបញ្ចប់ប្រហែលប្រាំគីឡូម៉ែត្រ ពីច្រកទ្វារព្រំដែនម៉ុកបៃ។ គម្រោងនេះ ត្រូវបានអនុម័តនៅក្នុងខែសីហា ឆ្នាំ២០២៤ ដោយនាយករដ្ឋមន្ត្រី ជាមួយនឹងការវិនិយោគសរុបប្រមាណ៧៥៥ លានដុល្លារ ហើយកំពុងត្រូវបានអនុវត្តន៍ ក្រោមគំរូភាពជាដៃគូរដ្ឋ-ឯកជន សាងសង់-ដំណើរការ-ផ្ទេរ (BOT)។ ការសាងសង់ត្រូវបានគេរំពឹងថា នឹងបញ្ចប់នៅថ្ងៃទី៣១ ខែធ្នូ ឆ្នាំ២០២៧។ មន្ត្រីវៀតណាមបាននិយាយថា អាជ្ញាធរមូលដ្ឋានកំពុងពន្លឿនការរៀបចំគម្រោង ការជ្រើសរើសវិនិយោគិន និងការសម្អាតទីតាំង ដើម្បីសម្រេចតាមពេលវេលាសាងសង់ និងធ្វើសមកាលកម្មការបញ្ចប់ជាមួយនឹងផ្លូវល្បឿនលឿនរបស់កម្ពុជា។ ឆ្លងកាត់ព្រំដែន ផ្លូវល្បឿនលឿនភ្នំពេញ-បាវិតប្រវែង ១៣៥ គីឡូម៉ែត្ររបស់កម្ពុជា បានបើកការដ្ឋានសាងសង់ក្នុងខែមិថុនា ឆ្នាំ២០២៣ ហើយកំពុងរីកចម្រើនឆ្ពោះ ទៅរកការបញ្ចប់នៅឆ្នាំ២០២៧។ ដោយមានការគាំទ្រ ពីការវិនិយោគចំនួន១,៣ ប៊ីលានដុល្លារពីសាជីវកម្មផ្លូវថ្នល់ និងស្ពានចិន ក្រោមគំរូ BOT ជាមួយនឹងសម្បទានប្រតិបត្តិការរយៈពេល៥០ឆ្នាំ ចុងបញ្ចប់ផ្លូវល្បឿនលឿនបួនគន្លងនេះ ស្ថិតនៅចម្ងាយប្រហែល១០ ទៅ១៥គីឡូម៉ែត្រពីព្រំដែនវៀតណាម ដោយរង់ចាំកិច្ចព្រមព្រៀងតភ្ជាប់ចុងក្រោយ។ គម្រោងនេះ បង្កើតបានជាផ្នែកមួយនៃគំនិតផ្តួចផ្តើម ខ្សែក្រវ៉ាត់ និងផ្លូវរបស់ប្រទេសចិន ហើយត្រូវបានគេរំពឹងថា នឹងក្លាយជាផ្លូវល្បឿនលឿនប្រតិបត្តិការទីពីររបស់កម្ពុជា បន្ទាប់ពីផ្លូវភ្នំពេញ-ក្រុងព្រះសីហនុ។ បច្ចុប្បន្ន អ្នកធ្វើដំណើរ និងទំនិញពឹងផ្អែកលើផ្លូវជាតិលេខ១ របស់កម្ពុជា និងផ្លូវល្បឿនលឿនជាតិលេខ២២ របស់វៀតណាម ដើម្បីធ្វើដំណើររវាងទីក្រុងទាំងពីរ ជាផ្លូវដែលតែងតែជួបបញ្ហាកកស្ទះ។ ការជំរុញឱ្យមានការតភ្ជាប់ ផ្លូវល្បឿនលឿននេះកើតឡើង ខណៈដែលពាណិជ្ជកម្ម រវាងប្រទេសទាំងពីរបន្តកើនឡើង។ បច្ចុប្បន្នវៀតណាមគឺជាទីផ្សារនាំចេញធំបំផុតទីពីរ របស់ប្រទេសកម្ពុជាបន្ទាប់ពីសហរដ្ឋអាមេរិក ដែលមានចំនួន១១,៦ភាគរយ នៃការនាំចេញសរុប ដែលមានតម្លៃប្រហែល៣៣៧ លានដុល្លារនៅក្នុងខែមករាឆ្នាំនេះ។ ការនាំចេញទៅកាន់ប្រទេសវៀតណាម បានកើនឡើង២១,១ ភាគរយ ធៀបនឹងរយៈពេលមួយឆ្នាំនៅក្នុងខែមករា ដែលឆ្លុះបញ្ចាំងពីការពង្រឹងសមាហរណកម្មសេដ្ឋកិច្ច៕