កណ្ដាល ៖ កំណាត់ផ្លូវជាតិលេខ២៣ ប្រវែង ១៩,៨៣គីឡូម៉ែត្រ តភ្ជាប់ពីគល់ស្ពានកោះធំ ដល់ស្រុកលើកដែក ខេត្តកណ្ដាល ត្រូវបានដាក់សម្ពោធឱ្យប្រើប្រាស់ជាផ្លូវការហើយ កាលពីព្រឹកថ្ងៃទី២៧ ខែមេសា ឆ្នាំ ២០២៦ ក្រោមអធិបតីភាព រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការនិងដឹកជញ្ជូន ។បើតាមរបាយការណ៍របស់ក្រសួងសាធារណការ និងដឹកជញ្ជូន បានឱ្យដឹងថា កំណាត់ផ្លូវជាតិលេខ២៣ ដែលមានប្រវែងជិត២០គីឡូម៉ែត្រនេះ ចាប់ផ្ដើមពីស្ពានគីឡូម៉ែត្រ ៣៤+៤០០ ត្រង់ចំណុចគល់ស្ពានកោះធំ ស្ថិតនៅក្នុងឃុំជ្រោយតាកែវ ឆ្លងកាត់ឃុំលើកដែក ស្រុកកោះធំ រហូតដល់ឃុំពាមរាំង ស្រុកលើកដែក ដែលតភ្ជាប់ជាមួយផ្លូវជាតិលេខ១៤ ត្រង់ចំណុចគីឡូម៉ែត្រលេខ៥៤+២៣៣ នៃភូមិសាស្ត្រខេត្តកណ្ដាល ។ គម្រោងនេះ មានទទឹងតួផ្លូវ ប្រវែង ១១ម៉ែត្រ ជាប្រភេទផ្លូវក្រាលកៅស៊ូ AC កម្រាស់៨សង់ទីម៉ែត្រ មានគន្លងផ្លូវសម្រាប់រថយន្តនកងទោចក្រយានធ្វើចរាចរណ៍ ( ២គន្លងទៅមក ) ។ របាយការណ៍បានឱ្យដឹងទៀតថា គម្រោងផ្លូវនេះ រួមបញ្ចូលនូវការស្ថាបនាស្ពានចំនួន៣កន្លែង ប្រវែអសរុប១១៦,៤០ម៉ែត្រ ការដាក់លូគ្រប់ប្រភេទ កាត់ទទឹងផ្លូវ ចំនួន៤៨កន្លែង និងលូតាមប្រឡាយចំនួន៨កន្លែង ប្រវែងសរុប ២ ៣៤២ម៉ែត្រ បំពាក់អំពូលសូឡា LED ចំនួន៨០កន្លែង ព្រមទាំងការបំពាក់ផ្លាកសញ្ញាគូសគំនូសសញ្ញា ដាំបង្គោលគីឡូម៉ែត្រ និងបង្គោលសុវត្ថិភាព ទៅទាមបទដ្ឋានបច្ចេកទេសផ្លូវថ្នល់ ។ លើសពីនេះ គម្រោងនេះ មានាករស្ថាបនារង្វង់មូល១កន្លែង នៅត្រង់ចំណុចផ្លូវប្រសព្វទិស ចុះពីស្ពានកោះធំ ដើម្បីសម្រួល និងបញ្ចៀសទិសដៅចរាចរណ៍ទៅមក ប្រកបដោយសុវត្ថិភាព ។ គួរបញ្ជាក់ថា កំណាត់ផ្លូវជាតិលេខ២៣នេះ ត្រូវបានបើកការដ្ឋានសាងសង់កាលពីថ្ងៃទី២០ ខែមិថុនា ឆ្នាំ ២០២៣ ក្រោមវត្តមានរបស់លោកអូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ៕