កិច្ចប្រជុំពិភាក្សាស្ដីពីវឌ្ឍនភាពការងាររបស់គណៈកម្មការអន្តរក្រសួងគ្រប់គ្រងការលក់លេខចុះបញ្ជីយានជំនិះ ប្រចាំខែមេសា ឆ្នាំ២០២៦ ទីស្ដីការក្រសួង៖ នារសៀលថ្ងៃចន្ទ ទី៤ ខែឧសភា ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួងគ្រប់គ្រងការលក់លេខចុះបញ្ជីយានជំនិះ បានអញ្ជើញដឹកនាំកិច្ចប្រជុំពិភាក្សាស្តីពីវឌ្ឍនភាពការងាររបស់គណៈកម្មការអន្តរក្រសួងគ្រប់គ្រងការលក់លេខចុះបញ្ជីយានជំនិះ ប្រចាំខែមេសា ឆ្នាំ២០២៦ ដោយមានការចូលរួមពីថ្នាក់ដឹកនាំក្រសួង តំណាងក្រសួងសេដ្ឋកិច្ច និងហិរញ្ញវត្ថុ តំណាងអង្គភាពប្រឆាំងអំពើពុករលួយ តំណាងសាលារាជធានីភ្នំពេញ សមាជិកសមាជិកាគណៈកម្មកាអន្តរក្រសួង និងមន្ត្រីជំនាញនាយកដ្ឋានពាក់ព័ន្ធជាច្រើនរូបផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យមើលពីរបាយការណ៍វឌ្ឍនភាពនៃការលក់លេខចុះបញ្ជីយានជំនិះ ការស្វែងរកដំណោះលើបញ្ហាប្រឈមឱ្យបានទាន់ពេលវេលា និងបញ្ហាផ្សេងៗ សំដៅពង្រឹងដល់ការលក់ និងគ្រប់គ្រងការចុះបញ្ជីយានជំនិះ ឱ្យកាន់តែមានប្រសិទ្ធភាព ព្រមទាំងធានាដល់ការគ្រប់គ្រងចំណូលពីការលក់លេខចុះបញ្ជីយានជំនិះឱ្យមានតម្លាភាពថែមទៀត ។ លោកជំទាវរដ្ឋលេខាធិការប្រចាំការ ក៏បានស្នើឱ្យក្រុមការងារពាក់ព័ន្ធរបស់គណៈកម្មការអន្តរក្រសួងពិនិត្យ និងជួយណែនាំ និងជំរុញលើកទឹកចិត្តបន្ថែមទៀតដល់មន្ត្រីក្រោមឱវាទរបស់ខ្លួន ជាពិសេសមន្ត្រីដែលកំពុងបម្រើសេវាសាធារណៈនៅតាមមណ្ឌលនីមួយៗដោយផ្ទាល់ជាមួយប្រជាពលរដ្ឋ ធ្វើយ៉ាងណាឱ្យបំពេញការងាររបស់ខ្លួនប្រកបដោយការទទួលខុសត្រូវខ្ពស់ មានតម្លាភាព ច្បាស់លាស់ ឆាប់រហ័ស ផ្ដល់ទំនុកចិត្តដល់អ្នកប្រើប្រាស់ និងពង្រឹងការផ្ដល់សេវាប្រកបដោយប្រសិទ្ធភាពខ្ពស់។ ជាមួយគ្នានេះ លោកជំទាវប្រធានអង្គប្រជុំ បានណែនាំឱ្យអនុគណៈកម្មការពាក់ព័ន្ធ បន្ថែមការផ្សព្វផ្សាយ អប់រំឱ្យបានទូលំទូលាយ ដល់សាធារណជនបានយល់ច្បាស់ពីការប្រើសប្រាស់ប្រព័ន្ធស្វ័យប្រវត្តិកម្មរបស់ក្រសួង និងរៀបចំបណ្តុះបណ្តាលក្រុមការងារបច្ចេកទេស និងដៃគូឯកជនបន្ថែមទៀតឱ្យកាន់តែច្បាស់លាស់ពីការងារលេខពិសេស និងលេខពិសេសផ្ទាល់ខ្លួន ដើម្បីឆ្លើយតបទៅនឹងតម្រូវការជាក់ស្ដែង៕