ក្រុមការងារអន្តរស្ថាប័ន ចុះពិនិត្យទីតាំង ត្រៀមរៀបចំពិធីខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ ឧសភា ឆ្នាំ២០២៦ និងខួបអនុស្សាវរីយ៍លើកទី៣០ នៃជំនួយអភិវឌ្ឍន៍ផ្លូវការរបស់ជប៉ុន សម្រាប់កំពង់ផែស្វយ័តក្រុងព្រះសីហនុ (១៩៩៦-២០២៦) ព្រះសីហនុ៖ នាថ្ងៃទី២៧ ខែមេសា ឆ្នាំ២០២៦ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំក្រុមការងារ ចុះពិនិត្យទីតាំង ដើម្បីត្រៀមរៀបចំពិធីខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ ឧសភា ឆ្នាំ២០២៦ និងខួបអនុស្សាវរីយ៍លើកទី៣០ នៃជំនួយអភិវឌ្ឍន៍ផ្លូវការរបស់ជប៉ុន សម្រាប់កំពង់ផែស្វយ័តក្រុងព្រះសីហនុ (១៩៩៦-២០២៦) ក្រោមការដឹកនាំរបស់ ឯកឧត្តម សន្តិបណ្ឌិត យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី។ ក្នុងការចុះពិនិត្យនេះ មានការចូលរួមពី ឯកឧត្តម នាយករងខុទ្ទកាល័យសម្តេចធីបតីនាយករដ្ឋមន្ត្រី ឯកឧត្តមអភិបាល នៃគណៈអភិបាលខេត្តព្រះសីហនុ ឯកឧត្តមប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ គណៈកម្មាធិការជាតិរៀបចំបុណ្យជាតិ-អន្ដរជាតិ អាជ្ញាធរមានសមត្ថកិច្ច និងមន្ត្រីជំនាញពាក់ព័ន្ធមួយចំនួនទៀត។ គោលបំណងនៃការចុះពិនិត្យនេះ គឺដើម្បីពិនិត្យវឌ្ឍនភាពការងាររបស់គណៈកម្មការ និងអនុគណៈកម្មការនីមួយៗ ព្រមទាំងពិនិត្យការងារដែលនៅសេសសល់ និងបែងចែកតួនាទីភារកិច្ចឱ្យបានច្បាស់លាស់ ស្របតាមការទទួលខុសត្រូវរបស់គណៈកម្មការនីមួយៗ ដើម្បីធានាឱ្យការរៀបចំពិធីអាចប្រព្រឹត្តទៅបានយ៉ាងរលូន តាមផែនការដែលបានគ្រោងទុក។ ពិធីខាងលើ នឹងប្រព្រឹត្តទៅនៅថ្ងៃទី១ ខែឧសភា ឆ្នាំ២០២៦ ស្ថិតក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅបរិវេណកំពង់ផែស្វយ័តក្រុងព្រះសីហនុ។ ថ្លែងក្នុងឱកាសនេះ ឯកឧត្តមសន្តិបណ្ឌិត បានណែនាំឱ្យក្រុមការងារទទួលបន្ទុកគ្រប់ផ្នែក ត្រៀមរៀបចំ និងអនុវត្តភារកិច្ចរបស់ខ្លួនឱ្យបានច្បាស់លាស់ ព្រមទាំងបង្កើនកិច្ចសហការយ៉ាងជិតស្និទ្ធជាមួយភាគីពាក់ព័ន្ធទាំងអស់ ដើម្បីធានាឱ្យដំណើរការកម្មវិធីប្រព្រឹត្តទៅដោយរលូន ប្រកបដោយសុវត្ថិភាព និងប្រសិទ្ធភាពខ្ពស់៕