កិច្ចប្រជុំស្តីពីស្ថានភាពនៃការគ្រប់គ្រងវិស័យទឹកកខ្វក់នៅកម្ពុជា ជាមួយក្រុមការងារ K-OPT នៃវិទ្យាស្ថាន AgroParisTech ទីស្តីការក្រសួង៖ នាថ្ងៃព្រហស្បតិ៍ ទី២៣ ខែមេសា ឆ្នាំ២០២៦ លោក ពូ ម៉ានិត អគ្គនាយករង នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាជាមួយក្រុមការងារ K-OPT នៃវិទ្យាស្ថាន AgroParisTech ដែលដឹកនាំដោយលោក Jean Antoine FABY នាយកវិទ្យាស្ថាន AgroParisTech។ កិច្ចប្រជុំនេះ រៀបចំឡើងក្នុងគោលបំណង ដើម្បីពិភាក្សានិងស្វែងយល់អំពីស្ថានភាពនៃការគ្រប់គ្រងវិស័យទឹកកខ្វក់នៅកម្ពុជា ទាំងអតីតកាលនិងបច្ចុប្បន្ន ដោយមានការអញ្ជើញចូលរួមពីថ្នាក់ដឹកនាំនៃអគ្គនាយកដ្ឋានប្រព័ន្ធចម្រោះទឹកកខ្វក់ មន្ត្រីជំនាញពាក់ព័ន្ធ ព្រមទាំងក្រុមការងារ K-OPT ដែលជាសិក្ខាកាម នៃកម្មវិធីអនុបណ្ឌិតប្រតិបត្តិលើកទី១០ (ទឹកសម្រាប់ទាំងអស់គ្នា) មកពីប្រទេសចំនួន ២៤ ក្នុងតំបន់ Africa, Asia, និង Eurasia ក្នុងនោះក៏មានសិក្ខាកាមដែលមកពីអគ្គនាយកដ្ឋានប្រព័ន្ធចម្រោះទឹកកខ្វក់ផងដែរ៕