កិច្ចប្រជុំពិភាក្សាអំពីវឌ្ឍនភាពការងារសិក្សាសមិទ្ធិលទ្ធភាពគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ១ និងសាងសង់ស្ពានមេគង្គថ្មី ទីស្តីការក្រសួង៖នាថ្ងៃចន្ទ ទី៦ ខែមេសា ឆ្នាំ២០២៦ ឯកឧត្តម តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យ និងពិភាក្សាអំពីវឌ្ឍនភាពការងារសិក្សាសមិទ្ធិលទ្ធភាព (Feasibility Study) នៃគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ១ និងការសាងសង់ស្ពានមេគង្គថ្មី ដោយមានការអញ្ជើញចូលរួមពីសំណាក់ថ្នាក់ដឹកនាំក្រសួង មន្ត្រីជំនាញពាក់ព័ន្ធ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងធនធានទឹក និងឧតុនិយម តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) ទាំងពីរការិយាល័យប្រចាំកម្ពុជា (JICA Cambodia Office) និងស្នាក់ការកណ្តាល (JICA Headquarters) ព្រមទាំងជំនាញការប្រចាំក្រសួងផងដែរ។ កិច្ចប្រជុំត្រូវបានរៀបចំឡើងក្នុងគោលបំណងសំខាន់មួយចំនួន រួមមានៈ ១). ពិនិត្យលទ្ធផលបឋមៈតាមដានវឌ្ឍនភាពនៃការសិក្សាបច្ចេកទេសលើកំណាត់ផ្លូវជាតិលេខ ១ ដើម្បីធានាបាននូវគុណភាព និងប្រសិទ្ធភាពយូរអង្វែង ២). ពិភាក្សាលើគម្រោងស្ពានមេគង្គថ្មី៖ ពិនិត្យលទ្ធភាព និងផលប៉ះពាល់ផ្សេងៗក្នុងការសាងសង់ស្ពានថ្មី ដើម្បីជួយសម្រួលដល់ការធ្វើដំណើរ និងការដឹកជញ្ជូនទំនិញឱ្យកាន់តែរហ័ស ៣). កិច្ចសហការអន្តរក្រសួង និងដៃគូអភិវឌ្ឍន៍៖ សម្របសម្រួលការងារបច្ចេកទេសជាមួយ JICA និងក្រសួងពាក់ព័ន្ធ ដើម្បីឱ្យការសិក្សានេះឆ្លើយតបទៅនឹងស្តង់ដារបច្ចេកទេស និងតម្រូវការសេដ្ឋកិច្ចជាតិ។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានកោតសរសើរដល់ក្រុមការងារបច្ចេកទេស និងតំណាងស្ថាប័នទាំងអស់ ដែលបានខិតខំប្រឹងប្រែងជំរុញការសិក្សានេះឱ្យលេចចេញជារូបរាងឡើង ដែលជាចំណែកយ៉ាងសំខាន់ក្នុងការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូននៅកម្ពុជា ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល៕