ប្រជាពលរដ្ឋក្នុងភូមិ ក្រពើត្បូង ឃុំភ្នំសំពៅ បានសំដែងការអបអរសាទរ ចំពោះសមិទ្ធផលថ្មី គឺផ្លូវមួយខ្សែ ក្រាលថ្មមិច ប្រវែង ១២ គីឡូម៉ែត្រ ទទឹង ៤ ម៉ែត្រ និងស្លាកសញ្ញា គម្រោង ២ កន្លែង ជាគម្រោងមូលនិធិឃុំ ភ្នំសំពៅ ឆ្នាំ ២០២៦ ដែលត្រូវបានបើកការដ្ឋាន សាងសង់នាព្រឹកថ្ងៃទី១ ខែមេសា ឆ្នាំ ២០២៦នេះ ។ ក្នុងប្រសាសន៍សំណេះសំណាល ឯកឧត្តម សុខលូ អភិបាលខេត្តបាត់ដំបង បានមានប្រសាសន៍ថា ការអភិវឌ្ឍលើគ្រប់វិស័យ គឺជាទិសដៅ អាទិភាពរបស់ រាជរដ្ឋាភិបាលកម្ពុជា ដែលតែងតែផ្តោតការយកចិត្តទុកដាក់ យ៉ាងខ្លាំងចំពោះ សុខទុក្ខ និងជីវភាពរស់នៅ របស់ប្រជាពលរដ្ឋ ។ ឯកឧត្តមបានលើកឡើងទៀតថា សព្វថ្ងៃនេះ រដ្ឋបាលខេត្ត នៅមានគម្រោងអភិវឌ្ឍន៍ច្រើនណាស់ ដែលយើង បាននិងកំពុងអនុវត្ត ហើយមិនមែនធ្វើតែផ្លូវកៅស៊ូ ផ្លូវចាក់បេតុង ប៉ុណ្ណោះទេ គឺទាំងផ្លូវលំ ផ្លូវក្រាលគ្រួសក្រហម ផ្លូវក្រាលថ្មមិច ដែលយើងបានបើកការដ្ឋាន នាពេលនេះជាសក្ខីភាពស្រាប់។ ឯកឧត្តមក៏បានសំណូមពរដល់ ក្រុមហ៊ុនដែលដេញថ្លៃបាន សូមអនុវត្តធ្វើយ៉ាងណាធានាបាន គុណភាព រឹងមាំ ទៅតាមស្តង់ដា និងបរិមាណលឿនឆាប់រហ័ស សម្រាប់ប្រជាពលរដ្ឋ ក្នុងភូមិក្រពើត្បូង ក៏ដូចជាប្រជាពលរដ្ឋ ក្នុងឃុំសំពៅទាំងមូល ដែលជាផ្នែកមួយ រួមចំណែក លើកកម្ពស់ជីវភាពរស់នៅ របស់ប្រជាពលរដ្ឋ ឱ្យកាន់តែមានភាពល្អប្រសើរ ៕