មន្ទីរសាធារណការខេត្តក្រចេះ បានបន្តលើកកម្ពស់ការផ្តល់សេវាគ្រប់ប្រភេទទាំងផ្លូវគោកនិងផ្លូវទឹក ដែលរួមមាន៖ ការចុះបញ្ជីរថយន្តធុនធ្ងន់ ការប្រឡងយកបណ្ណបើកបរ ការត្រួតពិនិត្យលក្ខណៈបច្ចេកទេសយានយន្ត ការផ្សព្វផ្សាយច្បាប់ចរាចរណ៍ផ្លូវគោក ជាដើម ។ លោក សាំង ប៊ុនថេន ប្រធានមន្ទីរសាធារណការ និងដឹកជញ្ជូនខេត្តក្រចេះ បានមានប្រសាសន៍ថា មន្ទីរបានពង្រឹងសេវាដឹកជញ្ជូនផ្លូវគោក និងផ្លូវទឹក សម្រាប់ការងារចុះបញ្ជី៖ ក្រសួងសាធារណការ និងដឹកជញ្ជូន បានធ្វើប្រតិភូកម្មជូនទៅច្រកចេញចូលតែមួយខេត្តក្រចេះ ក្នុងការចុះបញ្ជីរថយន្តធុនតូច និងម៉ូតូជូនច្រកចេញចូលតែមួយខេត្ត,ក្រុង,ស្រុក។ ដោយឡែករថយន្តធុនធំចុះបញ្ជីនៅមន្ទីរសាធារណការនិងដឹកជញ្ជូនខេត្តក្រចេះ ហើយ ការងារចុះបញ្ជីនាពេលបច្ចុប្បន្ននេះ អនុវត្តបានឆាប់រហ័សជូនប្រជាពលរដ្ឋ មិនមានការរង់ចាំយូរថ្ងៃ ។ លោកបានបន្តថា ការប្រឡងយកបណ្ណបើកបរត្រូវមានតម្លាភាព ត្រឹមត្រូវ ច្បាស់លាស់ ផ្តល់សេវារហ័សជូនបេក្ខជន ដែលមកដាក់ពាក្យស្នើសុំប្រឡងនៅច្រកចេញចូលតែមួយរបស់រដ្ឋបាលខេត្ត រួចស្នើសុំថ្ងៃប្រឡង មកគណៈកម្មការប្រឡងយកបណ្ណបើកបរមន្ទីរ និងបានប្រឡងដោយ មិនរង់ចាំយូរថ្ងៃ ហើយការប្រឡងមានសុក្រឹត្យភាព អ្នកចេះគឺជាប់ ។ ខេត្តក្រចេះ មានមណ្ឌលត្រួតពិនិត្យលក្ខណៈបច្ចេកទេសសាខាទី១ នៅចំណុចផ្លូវបំបែកខ្លាស្ទុះ ដែលបម្រើសេវាជូនប្រជាពលរដ្ឋរៀងរាល់ម៉ោងធ្វើការ មិនមានការរង់ចាំយូរឡើយ ។សម្រាប់ការដឹកជញ្ជូនទំនិញ ខេត្តមានបណ្តាញខ្សែផ្លូវជាតិនិងផ្លូវខេត្តប្រទាក់ក្រឡាគ្នា ស្ថានភាពផ្លូវថ្នល់ល្អប្រសើរ មិនមានខូចខាត សំបុកមាន់ ។ល។ លោកបានបន្តទៀតថា ការផ្សព្វផ្សាយច្បាប់ចរាចរណ៍ផ្លូវគោក មន្ទីរមានក្រុមការងារចុះធ្វើការផ្សព្វផ្សាយជាប់ជាប្រចាំរៀងរាល់សប្តាហ៍តាមគោលដៅសំខាន់ៗ ដោយមានផែនការសកម្មភាពដែលអនុលោមតាមក្រសួងសាធារណការនិងដឹកជញ្ជូន ទៅតាមក្រុមការងារនីមួយៗ ។ « ការផ្សព្វផ្សាយច្បាប់ចរាចរណ៍ផ្លូវគោកគឺសំខាន់ ហើយចំពោះទីតាំងផ្សព្វផ្សាយមានចំណតរថយន្ត ទីប្រជុំជន សាលារៀន និងមានការសហការជាមួយកម្លាំងចរាចរណ៍ និងស្ថាប័នពាក់ព័ន្ធជំនាញ និងអាជ្ញាធរដែនដី ដើម្បីចុះផ្សព្វផ្សាយ ម្យ៉ាងវិញទៀតក៏យើងបានយកចិត្តទុកដាក់លើតំបន់ណាដែលមានគ្រោះថ្នាក់ញឹកញាប់ គឺត្រូវសិក្សាទីតាំងនោះ ថាតើកើតឡើងដោយសារបញ្ហាអ្វី គឺត្រូវចុះសិក្សាជាប្រចាំ » ។ រីឯការងារដឹកជញ្ជូនផ្លូវទឹក មន្ទីរសាធារណការនិងដឹកជញ្ជូនខេត្តក្រចេះ មានក្រុមការងារចុះត្រួតពិនិត្យជាប្រចាំតាមកំពង់ដ កំពង់ចម្លង ទូទាំងខេត្ត ជំរុញការអនុវត្តច្បាប់ដឹកជញ្ជូនតាមផ្លូវទឹក និងពង្រឹងសុវត្ថិភាពលើដចម្លង ៕