ភ្នំណាមលៀរ បានប្រែក្លាយពីតំបន់ព្រៃភ្នំយ៉ាងស្ងាត់ជ្រងំទៅជារមណីយដ្ឋាន សម្រាប់បងប្អូនទៅលេងកម្សាន្ត ហើយក៏បានផ្តល់ការងារដល់សមាជិកសហគមន៍ និងផ្តល់ឱកាសដល់ជនជាតិភាគតិច(ពូនង)ឱ្យឆ្លៀតឱកាសរកប្រាក់កម្រៃតាមរយៈការលក់ដូរវត្ថុអនុស្សាវរីយ៍ លក់ឱសថបុរាណ ភេសជ្ជៈ និងផលិតផលផ្លែឈើដូចជា គ្រាប់សណ្តែក គ្រាប់ម្រេច ចេក និងខ្នុរជាដើម។ សូមជម្រាបថា ភ្នំណាមលៀរ គឺជាទីតាំងទេសចរណ៍ដ៏ទាក់ទាញមួយ ស្ថិតនៅក្នុងស្រុកពេជ្រាដា ខេត្តមណ្ឌលគិរី។ ភ្នំនេះ ស្ថិតនៅភាគឦសាននៃប្រទេសកម្ពុជា ដែលមានចម្ងាយប្រមាណ៤៨ គីឡូម៉ែត្រពីក្រុងសែនមនោរម្យ និងមានប្រមាណ៤គីឡូម៉ែត្រពីព្រំប្រទល់ប្រទេសវៀតណាម។ ប្លែកពីភ្នំនានានៃប្រទេសកម្ពុជា ដោយនៅលើភ្នំណាមលៀរ ពុំមានដុះដើមឈើច្រូងច្រាងដូចបណ្ដាភ្នំដទៃនោះទេ ប៉ុន្តែទស្សនីយភាពនៅលើកំពូលភ្នំដែលមានផ្ទាំងថ្មលាតសន្ធឹងជាង៤ហិកតា អមដោយព្រៃឈើដ៏ខ្ពស់ៗព័ទ្ធជុំវិញ និងមានខ្យល់បរិសុទ្ធបក់រំភើយៗយ៉ាងត្រជាក់បានមកកំដរអារម្មណ៍បងប្អូនឱ្យជក់ចិត្ត គយគន់ទេសភាពដ៏ស្រស់ត្រកាល និងបំបាត់ក្ដីនឿយហត់បានមួយគ្រា៕ ប្រភពរូបភាពពី៖ មន្ទីរទេសចរណ៍ខេត្តមណ្ឌលគិរី