ថ្នាក់ដឹកនាំអគ្គនាយកដ្ឋានប្រព័ន្ធចម្រោះទឹកកខ្វក់ចូលរួមសន្និបាតលើកទី១៤ “បូកសរុបលទ្ធផលការងារប្រចាំ២០២៥ និងលើកទិសដៅការងារឆ្នាំ២០២៦ របស់សមាគមអ្នកផ្គត់ផ្គង់ទឹកស្អាតកម្ពុជា” ភ្នំពេញ៖ នាថ្ងៃព្រហស្បតិ៍ ទី១២ ខែមីនា ឆ្នាំ២០២៦ ឯកឧត្តម ចៅ សុភៈភិបាល អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន អមដោយមន្រ្តីបច្ចេកទេស បានចូលរួម ក្នុងសន្និបាតលើកទី១៤ “បូកសរុបលទ្ធផលការងារប្រចាំ២០២៥ និងលើកទិសដៅការងារឆ្នាំ២០២៦ របស់សមាគមអ្នកផ្គត់ផ្គង់ទឹកស្អាតកម្ពុជា” ក្រោមអធិបតីភាព ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍ (ក.ឧ.វ.ប.ន.) ដោយមានការអញ្ជើញចូលរួមពីក្រសួងស្ថាប័នពាក់ព័ន្ធ សហភាពអឺរ៉ុប (EU) អង្គការដៃគូ កម្មវិធី CAPRED អង្គការ Water.org អង្គការ WaterAid ក្រុមប្រឹក្សាភិបាល បុគ្គលិកសមាគម សមាជិកអាជីព និងសមាជិកគាំទ្រ សរុបចំនួន ៣៧៨រូប។ សន្និបាតនេះរៀបចំក្នុងគោលបំណងដើម្បីអបអរសាទរសមិទ្ធិផលរបស់សមាគមឆ្នាំ២០២៥ និងលើកទិសដៅការងារប្រចាំឆ្នាំ២០២៦ និងការប្រកាសសមាសភាពគណៈកម្មាធិការទាំង៤ (ស្វែងរកការគាំទ្រមតិ សេវាកម្មសមាជិក ហិរញ្ញវត្ថុ និងអភិវឌ្ឍន៍ បណ្តុះបណ្តាល) និងការអនុវត្តមូលនិធិអភិវឌ្ឍន៍សមាជិក និងវិស័យទឹកស្អាត (ម.អ.ស.វ)ដើម្បីចែករំលែកបទពិសោធន៍ការអនុវត្តល្អៗ និងអត្ថប្រយោជន៍នៃការចូលជាសមាជិកសមាគម ស្តាប់សំឡេងរបស់សមាជិក និងរួមគ្នាស្វែងរកដំណោះស្រាយ ក្នុងការបង្កើនទំនាក់ទំនងរវាងសមាជិកសមាគមឱ្យកាន់តែប្រសើរឡើង និងទស្សនាពិព័រណ៍បច្ចេកវិទ្យាថ្មីៗ។ សូមបញ្ជាក់ផងដែរថា គិតត្រឹមឆ្នាំ២០២៥ នេះ បរិមាណទឹកស្អាតផលិតបានសរុបប្រមាណ ៥៥៦លានម៉ែត្រគូប មានបណ្តាញផ្គត់ផ្គង់ទឹកស្អាតនៅទូទាំងប្រទេសមានប្រវែងជិត ៤០,០០០គីឡូម៉ែត្រ និងមានការតភ្ជាប់ទៅដល់ប្រមាណ១,៥៧លានគ្រួសារ ស្មើនឹងប្រមាណ៤៥% នៃគ្រួសារក្នុងតំបន់សេវា៕