ក្រសួងសាធារណការ និងដឹកជញ្ជូនបានបង្ហាញរបាយការណ៍ចំណូលពីវិស័យសាធារណការដែលក្នុងនោះចំណូលបានមកពីការលក់ស្លាកលេខពិសេស និងពិសេសផ្ទាល់ខ្លួន ក្នុងឆ្នាំ ២០២៥ រកបានប្រមាណ ២៩ លានដុល្លារកើនឡើង ៤៣,១០% ធៀបនឹងឆ្នាំ២០២៤ ដែលមានចំនួន ២០,៥១ លានដុល្លារអាម៉េរិក។របាយការណ៍របស់ក្រសួងបានបញ្ជាក់ថា ក្នុងឆ្នាំ ២០២៥ ក្រសួងបានចុះបញ្ជីរថយន្តបំពាក់ផ្លាកលេខពិសេស និងយានយន្តបំពាក់ផ្លាកលេខពិសេសផ្ទាល់ខ្លួនមានចំនួន ៥,៦៣ ម៉ឺនគ្រឿង ដែលក្នុងនោះរថយន្តបំពាក់ផ្លាកលេខពិសេសមានចំនួន ៣,៨១ ម៉ឺនគ្រឿង និងពិសេសផ្ទាល់ខ្លួនមានចំនួន ១,៨២ម៉ឺនគ្រឿង ខណៈចំណូលបានកើនឡើងដល់ ២៩,៣៥ លានដុល្លារអាម៉េរិក ធៀបនឹងឆ្នាំ២០២៤ ដែលមានចំនួន ២០,៥១ លានដុល្លារអាម៉េរិក។ក្នុងរបាយការណ៍ក៏បានបង្ហាញដែរថា ក្នុងឆ្នាំ ២០២៥ មានយានយន្តសរុបចំនួន ៥២,២៤ ម៉ឺនគ្រឿងត្រូវបានចុះបញ្ជី (ក្នុងនោះម៉ូតូមានចំនួន ៤២,៩៣ ម៉ឺនគ្រឿង និងរថយន្តគ្រប់ប្រភេទមានចំនួន ៩,៣១ម៉ឺនគ្រឿង)។ ដោយឡែក យានយន្តដើរដោយថាមពលអគ្គិសនី (EV) ដែលចុះបញ្ជីមានចំនួន ៧ ៩៧១គ្រឿង កើនឡើង ១២៧% ធៀបនឹងឆ្នាំ២០២៤ ដែលមានចំនួន ៣ ៥០៨គ្រឿង។ បើគិតពីឆ្នាំ ១៩៩០ ដល់ឆ្នាំ ២០២៥ យានយន្តបានចុះបញ្ជីសរុបមានចំនួន ៨,២១ លានគ្រឿង (ក្នុងនោះម៉ូតូមានចំនួន ៦,៩៦ លានគ្រឿង រថយន្តធុនស្រាលមានចំនួន ៩៤,០៨ម៉ឺនគ្រឿង និងរថយន្ត ធុនធ្ងន់ចំនួន ៣១ ម៉ឺនគ្រឿង៕