កិច្ចប្រជុំជាមួយក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) ក្នុងការរៀបចំផែនការមេសម្រាប់គម្រោងភាពជាដៃគូរវាងរដ្ឋ និងឯកជន (PPP Master Plan) ទីស្ដីការក្រសួង៖ នារសៀលថ្ងៃព្រហស្បតិ៍ ទី២៦ ខែកុម្ភៈ ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំប្រតិភូចូលរួមកិច្ចប្រជុំជាមួយ ឯកឧត្តម មាស សុខសេនសាន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) ក្នុងការរៀបចំផែនការមេសម្រាប់គម្រោងភាពជាដៃគូរវាងរដ្ឋ និង ឯកជន (PPP Master Plan) ដោយមានការអញ្ជើញចូលរួមពី ឯកឧត្តមទីប្រឹក្សាក្រសួងសាធារណការ និងដឹកជញ្ជូន ឯកឧត្តមអនុរដ្ឋលេខាធិការ លោកស្រីគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់ លោកប្រធានគ្រប់គ្រងគម្រោង នៃក្រសួងសាធារណការ និងដឹកជញ្ជូន ឯកឧត្តម លោក-លោកស្រី តំណាងក្រសួងសេដ្ឋកិច្ច និង ហិរញ្ញវត្ថុ និងធនាគារអភិវឌ្ឍន៍អាស៊ី (ADB)។ កិច្ចប្រជុំនេះរៀបចំឡើងក្នុងគោលបំណងដើម្បីផ្តល់ធាតុចូលជូនក្រុមការងារបច្ចេកទេសនៃក្រសួងសេដ្ឋកិច្ច និង ហិរញ្ញវត្ថុ និងក្រុមការងារធនាគារអភិវឌ្ឍន៍អាស៊ី (ADB) ក្នុងការពិនិត្យ និងធ្វើអត្តសញ្ញាណកម្មបឋម ទៅលើគម្រោងក្នុងវិស័យអាទិភាពដែលត្រូវបានកំណត់ដោយរាជរដ្ឋាភិបាល ក្នុងនោះរួមមាន វិស័យដឹកជញ្ជូនផ្លូវដែក និងការគ្រប់គ្រងទឹកកខ្វក់ ក្នុងការរៀបចំផែនការមេសម្រាប់គម្រោងភាពជាដៃគូរវាងរដ្ឋ និង ឯកជន (PPP Master Plan)៕