ការចុះពិនិត្យទីតាំងទីលានទុកដាក់សំរាម ស្ថានីយអាងប្រព្រឹត្តកម្មទឹកកខ្វក់ ស្ថានីយបូម និងទីតាំងគម្រោងដាំដេីមកោងកាង ក្នុងខេត្តកំពត កំពត៖ នាថ្ងៃព្រហស្បតិ៍ ទី១៩ ខែកុម្ភៈ ឆ្នាំ២០២៦ លោក សួន និមល អគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់ និងជាប្រធានចាត់ចែងគម្រោង បានអញ្ជេីញដឹកនាំក្រុមការងារជាសមាជិកគម្រោង ចុះពិនិត្យទីតាំងទីលានទុកដាក់សំរាម ស្ថានីយអាងប្រព្រឹត្តកម្មទឹកកខ្វក់ ស្ថានីយបូម និងទីតាំងគម្រោងដាំដេីមកោងកាង ដែលស្ថិតក្នុងដែនសមត្ថកិច្ច នៃគម្រោងកម្មវិធីវិនិយោគភាពធន់នឹងបម្រែបម្រួលអាកាសធាតុ និងសុវត្ថិភាពទឹកស្អាតតាមទីក្រុង ក្រោមក្របខ័ណ្ឌហិរញ្ញប្បទានពីធនាគារអភិវឌ្ឍន៍អាស៊ី (ADB)។ ការចុះត្រួតពិនិត្យនេះក៏មានការចូលរួមដោយ លោក-លោកស្រី សមាជិកអង្គភាពគ្រប់គ្រងគម្រោងនៃក្រសួងសាធារណការ និងដឹកជញ្ជូន និងក្រុមការងារធនាគារអភិវឌ្ឍន៍អាស៊ី (ADB)ផងដែរ ។ គោលបំណងការចុះពិនិត្យទីតាំងខាងលេីនេះ រៀបចំឡេីងដេីម្បីពិនិត្យពិភាក្សា និងវាយតម្លៃទីតាំងសំខាន់ៗសម្រាប់ការអនុវត្តគម្រោង ព្រមទាំងរៀបចំនូវផែនការសកម្មភាពសំខាន់ៗ ការអនុវត្តផែនការរំដោះស្រាយផលប៉ះពាល់បរិស្ថាន-សង្គម ធានាបាននូវលទ្ធផលរបស់គម្រោងទៅតាមពេលវេលាកំណត់ និងធនធានដែលបានកំណត់។