កំណាត់ផ្លូវខេត្តលេខ ៣៧៧ ហៅថា ផ្លូវមហាវិថីសម្ដេចតេជោ ហ៊ុន សែន ចាប់ពីរង្វង់មូលព្រាបស រហូតដល់រង្វង់មូលខ្លាស្ទុះ ឋិតក្នុងសង្កាត់អូរឫស្សី និងសង្កាត់ក្រចេះ ក្នុងក្រុងក្រចេះ ខេត្តក្រចេះ។ ផ្លូវមហាវិថីសម្តេចតេជោ ហ៊ុនសែន មានប្រវែងជាង ៥គីឡូម៉ែត្រ បានបញ្ចប់ដំណើរការអ៊ុតកៅស៊ូ AC រួចរាល់ជាស្ថាពរហើយ នៅតែការងារគំនូសចរាចរណ៍ បរិក្ខាផ្លូវ និងកែលំអរនៅតាមឃឿនផ្លូវថ្មើជើងបន្ថែមទៀត ដោយក្រុមការងារកំពុងពន្លឿន ហើយអាចនឹងរួចរាល់ក្នុងកំឡុងខែកុម្ភៈនេះ។ នេះតាមការឱ្យដឹងពីលោក ឈឺន រិទ្ធ ចៅសង្កាត់អូរឫស្សី។ លោក ឈឺន រិទ្ធ ចៅសង្កាត់អូរឫស្សី បានបញ្ជាក់ថា មហាវិថីសម្ដេចតេជោ ហ៊ុន សែន មានការស្ថាបនាសួនច្បារពុះចែកទ្រូងផ្លូវមានទំហំទទឹង ២ ម៉ែត្រ កំពស់ ២ តឹក។ ក្រុមការងារបច្ចេកទេសនឹងចាប់ផ្ដើមដំណើរការដាំបង្គោលភ្លើង ក្នុងខែមិនា ហើយដាំស្មៅនិងផ្កាបញ្ចប់ក្នុងខែមេសា។ កំណាត់ផ្លូវខេត្តលេខ ៣៧៧ ហៅថា ផ្លូវមហាវិថីសម្ដេចតេជោ ហ៊ុន សែន បានសម្រួលដល់ការកកស្ទះចរាចរណ៍និងការដឹកជញ្ជូនកសិផលផ្សេងៗ ទំនិញផលិតផល សម្រួលលើកកម្ពស់ជីវភាពរស់នៅប្រចាំថ្ងៃ របស់ប្រជាពលរដ្ឋ៕