កិច្ចប្រជុំអន្តរក្រសួងពិនិត្យលើសេចក្តីព្រាងអនុក្រឹត្យ ស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ទីស្ដីការគណៈរដ្ឋមន្ត្រី៖ នាថ្ងៃពុធ ទី១១ ខែកុម្ភៈ ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ ចូលរួមកិច្ចប្រជុំអន្តរក្រសួងលើសេចក្តីព្រាងអនុក្រឹត្យ ស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ក្រោមអធិបតីភាព ឯកឧត្តម ឆឺយ រឿន រដ្ឋលេខាធិការទីស្ដីការគណៈរដ្ឋមន្ត្រី ដោយមានការអញ្ជើញចូលរួមពីក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ នៃក្រសួងសាធារណការ និងដឹកជញ្ជូន ជាក្រសួងសាមីដែលជាម្ចាស់ឯកសារ និងជាម្ចាស់សំណើ ឯកឧត្តម-លោកជំទាវ និងក្រុមការងារនៃទីស្តីការគណៈរដ្ឋមន្ត្រី តំណាងក្រសួង-ស្ថាប័នពាក់ព័ន្ធចំនួន២៨ស្ថាប័ន ក្រុមប្រឹក្សាអ្នកច្បាប់ អាជ្ញាធរ គណៈកម្មាធិការ និងអង្គភាពដែលពាក់ព័ន្ធ សរុបសមាសភាព ចំនួន១៨៨រូប។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យពិភាក្សា និងផ្លាស់ប្ដូរមតិយោបល់ ពាក់ព័ន្ធនឹងខ្លឹមសារសេចក្តីព្រាងអនុក្រឹត្យ ស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ដើម្បីឱ្យសេចក្តីព្រាងអនុក្រឹត្យនេះមានភាពគ្រប់ជ្រុងជ្រោយ និងអាចអនុវត្តទៅបានដោយរលូន។ អង្គប្រជុំបានសម្រេចឯកភាពគ្នាលើខ្លឹមសារសេចក្ដីព្រាងអនុក្រឹត្យនេះ ហើយក្រុមការងារទីស្តីការគណៈរដ្ឋមន្ត្រីនឹងរៀបចំនីតិវិធីបន្តទៀត៕