កិច្ចប្រជុំផ្ទៃក្នុង ពិនិត្យ និងពិភាក្សាលើសេចក្ដីព្រាងច្បាប់ស្ដីពី ភស្តុភារកម្ម ទីស្ដីការក្រសួង៖ នាថ្ងៃអង្គារ ទី១០ ខែកុម្ភៈ ឆ្នាំ២០២៦ ឯកឧត្ដម ហេង ណន រដ្ឋលេខាធិការ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាផ្ទៃក្នុង ដើម្បីពិនិត្យ និងសម្អាតលើសេចក្ដីព្រាងច្បាប់ស្ដីពីភស្តុភារកម្ម បន្ទាប់ពីទទួលបានធាតុចូលនានាពីបណ្ដាក្រសួង ស្ថាប័ន អង្គភាពពាក់ព័ន្ធ វិស័យឯកជន និងដៃគូអភិវឌ្ឍន៍ ដោយមានការអញ្ជើញចូលរួមពី ថ្នាក់ដឹកនាំក្រសួង និងមន្រ្តីជំនាញនៃអគ្គនាយកដ្ឋានភស្តុភារកម្មជាច្រើនរូបផងដែរ។ កិច្ចប្រជុំពិភាក្សានេះ ធ្វើឡើងក្នុងគោលបំណងដើម្បីពិភាក្សា ពិនិត្យ និងកែសម្រួលចុងក្រោយលើសេចក្ដីព្រាងច្បាប់ស្ដីពីភស្តុភារកម្ម មុននឹងឈានដល់ការអនុវត្តនីតិវិធីបន្តបន្ទាប់។ ឯកឧត្ដមរដ្ឋលេខាធិការបាន ថ្លែងអំណរគុណយ៉ាងជ្រាលជ្រៅចំពោះអង្គប្រជុំ ដែលបានចូលរួមប្រឹងប្រែងរៀបចំ សេចក្ដីព្រាងស្ដីពីភស្តុភារកម្មឱ្យគ្រប់ជ្រុងជ្រោយ និងការពន្លឿនឱ្យសេចក្ដីព្រាងច្បាប់ អាចដាក់ឆ្លងថ្នាក់ដឹកនាំក្រសួងនាពេលឆាប់ៗ នេះ៕