ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញជាអធិបតីបូកសរុបមតិយោបល់ និងដោះស្រាយសំណូមពររបស់អង្គសន្និបាត និងលើកទិសដៅការងារឆ្នាំ២០២៦ របស់ក្រសួងសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃសុក្រ ទី៦ ខែកុម្ភៈ ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីបូកសរុបមតិយោបល់ និងដោះស្រាយសំណូមពររបស់អង្គសន្និបាត និងលើកទិសដៅការងារឆ្នាំ២០២៦ បន្ទាប់ពីអង្គសន្និបាតបានដំណើរការអស់រយៈពេល ១ថ្ងៃកន្លះកន្លងមកលើកិច្ចពិភាក្សា (Panel Discussion) ដែលបានជជែក និងពិភាក្សាយ៉ាងផុសផុល និងលើកជាសំណួរពាក់ព័ន្ធនឹងកិច្ចពិភាក្សារបស់ថ្នាក់ដឹកនាំ អគ្គនាយកដ្ឋានជំនាញ និងមន្ទីរសាធារណការ និងដឹកជញ្ជូនខេត្តពាក់ព័ន្ធ ក៏ដូចជាលើកជាសំណូមពរផ្សេងៗជូនអង្គសន្និបាត ដើម្បីផ្តល់ជាដំណោះស្រាយ និងដាក់ចេញនូវយន្តការពង្រឹងប្រសិទ្ធភាពការងារឱ្យកាន់តែប្រសើរឡើង។ គួរបញ្ជាក់ថា ដើម្បីឆ្លើយតបទៅនឹងបញ្ហាប្រឈមចំពោះមុខ និងសំណូមពរដែលបានលើកឡើងក្នុងកិច្ចពិភាក្សាសំណួរ-ចម្លើយ ក្រសួងបានដាក់ចេញនូវទិសដៅជាយុទ្ធសាស្ត្រសម្រាប់គ្រប់អង្គភាពក្រោមឱវាទយកទៅអនុវត្តក្នុងឆ្នាំ២០២៦ ដោយស្របតាមចក្ខុវិស័យសំខាន់ៗចំនួន២ រួមមាន ១)ការលើកកម្ពស់សេវាដឹកជញ្ជូនគ្រប់ប្រភេទ តាមរយៈការអភិវឌ្ឍ និងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថលក្នុងការគ្រប់គ្រង និងការផ្តល់សេវាប្រកបដោយភាពលឿន រហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត និង ២)ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូន ឱ្យមានគុណភាព សុវត្ថិភាព ចីរភាព ភាពធន់ និងបរិយាបន្ន៕