ពិធីបើកបវេសនកាល សម្រាប់ឆ្នាំសិក្សា ២០២៥-២០២៦ នៃវិទ្យាស្ថានតេជោសែន សាធារណការ និងដឹកជញ្ជូន ទីស្តីការក្រសួង៖ នាថ្ងៃអង្គារ ទី២៧ ខែមករា ឆ្នាំ២០២៦ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញជាអធិបតីក្នុងពិធីបើកបវេនសកាលឆ្នាំសិក្សាថ្មី ២០២៥-២០២៦ ដល់និស្សិតទាំងអស់ នៃវិទ្យាស្ថានតេជោសែន សាធារណការ និងដឹកជញ្ជូន ដោយមានការចូលរួមពីឯកឧត្តមអនុរដ្ឋលេខាធិការទទួលបន្ទុក ឯកឧត្តម លោកជំទាវ អគ្គនាយក ឯកឧត្តមនាយកវិទ្យាស្ថាន លោក-លោកស្រី ជាថ្នាក់ដឹកនាំ មន្រ្តីរាជការ លោកគ្រូ អ្នកគ្រូ និងប្អូនៗនិស្សិតផងដែរ។ ថ្លែងនាឱកាសនេះផងដែរ ឯកឧត្តមរដ្ឋលេខាធិការ ក៏បានសម្តែងនូវក្តីមោទនៈ ដែលក្រសួងសាធារណការ និងដឹកជញ្ជូន មានវិទ្យាស្ថានផ្ទាល់ ដែលជាគ្រឹះស្ថានសិក្សាមួយសម្រាប់បណ្តុះបណ្តាលយុវជនជំនាន់ក្រោយ នូវចំណេះដឹង ចំណេះធ្វើលើមុខជំនាញឯកទេស សំណង់សាធារណការ ឯកទេសគ្រប់គ្រងដឹកជញ្ជូន ភស្តុភារកម្ម និងឯកទេសនាវាចរណ៍ សម្រាប់វិស័យសាធារណការ និងដឹកជញ្ជូន និងសម្រាប់ប្រទេសជាតិទាំងមូលនាពេលអនាគត។ បន្ថែមពីនោះ ឯកឧត្តមរដ្ឋលេខាធិការ បានមានមតិផ្ដាំផ្ញើ និងលើកទឹកចិត្តប្អូនៗនិស្សិតទាំងអស់ សូមយកចិត្តទុកដាក់ចំពោះការសិក្សា ត្រូវរៀនឱ្យចេះ កុំរៀនត្រឹមឱ្យចប់ ត្រូវរៀនឱ្យចេះ ដើម្បីប្រើប្រាស់ចំណេះជំនាញទាំងនោះឱ្យមានប្រយោជន៍ សម្រាប់សង្គមជាតិ ដើម្បីក្លាយជាទំពាំងស្នងប្ញស្សីដ៏ល្អ និងក្លាយជាធនធានមនុស្សប្រកបដោយសមត្ថភាពក្នុងវិស័យកសាងហេដ្ឋារចនាសម្ព័ន្ធ ក្នុងការចូលរួមចំណែកដើម្បីអភិវឌ្ឍប្រទេសរបស់យើងឱ្យកាន់តែរីកចម្រើនឡើងថែមទៀត៕