កិច្ចប្រជុំពិនិត្យលទ្ធផលការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដើម្បីវាយតម្លៃការអនុវត្តច្បាប់ និងស្វែងរកវិធានការទប់ស្កាត់ការដឹកជញ្ជូនលើសទម្ងន់ ទីស្ដីការក្រសួង៖ នារសៀលថ្ងៃចន្ទ ទី២៦ ខែមករា ឆ្នាំ២០២៦ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានអញ្ជើញដឹកនាំកិច្ចប្រជុំពិនិត្យលទ្ធផលការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងលើកទិសដៅការងារបន្ត ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការទទួលបន្ទុក ប្រធាន អនុប្រធាន សមាជិក សមាជិកាលេខាធិការដ្ឋាន ក្រុមការងារជញ្ជីងចល័ត និងអនុប្រធានស្ថានីយជញ្ជីងអចល័តទូទាំងប្រទេស និងមន្ត្រីពាក់ព័ន្ធជាច្រើនផងដែរ។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យពិភាក្សា និងវាយតម្លៃលើលទ្ធផលការងារត្រួតពិនិត្យយានយន្តដឹកជញ្ជូនធុនធ្ងន់ និងពិភាក្សាស្វែងរកដំណោះ លើបញ្ហាប្រឈមនានា ដែលបានអនុវត្តការងារនាពេលកន្លងមក ក្នុងការពង្រឹងតួនាទី ភារកិច្ច លើការអនុវត្តការងារទប់ស្កាត់បទល្មើសការដឹកជញ្ជូនលើសទម្ងន់កម្រិតកំណត់ ឱ្យកាន់តែមានប្រសិទ្ធភាព និងប្រសិទ្ធផលខ្ពស់។ ថ្លែងក្នុងអង្គពិធី ឯកឧត្តមប្រធាន បានផ្តល់អនុសាសន៍ណែនាំដល់មន្រ្តីនៅតាមស្ថានីយត្រូវពង្រឹងសមត្ថភាព និងសាមគ្គីភាពគ្នាក្នុងស្ថានីយ គោរពវិន័យ និងពង្រឹងក្រមសីលធម៌វិជ្ជាជីវៈឱ្យបានខ្ជាប់ខ្ជួន និងជំរុញឱ្យបន្តផ្សព្វផ្សាយ អប់រំ និងណែនាំដល់ម្ចាស់អាជីវកម្មដ្ឋាន (ការដ្ឋានថ្ម, ដេប៉ូខ្សាច់) ឱ្យគោរពច្បាប់ មិនដឹកជញ្ជូនលើសទម្ងន់ដែលបានកំណត់ ក្នុងការត្រួតពិនិត្យយានយន្តដឹកធ្ងន់ៗនៅក្នុងដែនសមត្ថកិច្ចរបស់ខ្លួន ហើយត្រូវរាយការណ៍មកថ្នាក់ដឹកនាំ ដើម្បីចាត់វិធានការជាបន្ទាន់ និងត្រូវសហការឱ្យបានល្អជាមួយក្រុមចល័តក្រសួង ព្រមទាំងស្ថានីយទាំងអស់ឱ្យបានល្អ និងទាន់ពេលវេលា សំដៅពង្រឹងប្រសិទ្ធភាពការងារឱ្យកាន់តែមានភាពល្អប្រសើរថែមទៀត៕