ភ្នំពេញ ៖ នៅឆ្នាំ២០២៥ គ្រោះថ្នាក់ចរាចរណ៍បានកើតឡើងនៅទូទាំងប្រទេសជាង២ពាន់លើក បណ្ដាលឱ្យមនុស្សស្លាប់ជាង១ពាន់នាក់ និងអ្នករបួសជាង៣ពាន់នាក់ ។ ក្នុងកម្មវិធីបូកសរុបភាពការណ៍ និងលទ្ធផលកិច្ចប្រតិបត្តិការ ក្នុងការរក្សាសន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គម ប្រចាំឆ្នាំ២០២៥ និងទិសដៅការងារឆ្នាំ២០២៦ របស់អគ្គស្នងការដ្ឋាននគរបាលជាតិ នៅព្រឹកថ្ងៃទី៣០ ខែធ្នូ ឆ្នាំ២០២៥ ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានគូសបញ្ជាក់ថា ឆ្នាំ២០២៥ មានគ្រោះថ្នាក់ចរាចរណ៍ចំនួន ២.២៥៦លើក ធៀបឆ្នាំ២០២៤ ចំនួន ៣.០១៦លើក ថយចុះ ២៥% , អ្នកស្លាប់ចំនួន ១.៤១០នាក់ ធៀបឆ្នាំ២០២៤ ចំនួន ១.៥៩១នាក់ ថយចុះ ២៥% និងអ្នករបួសចំនួន ៣.០២៥នាក់ ធៀបឆ្នាំ២០២៤ ចំនួន ៤.០៤៦នាក់ ថយចុះ ២៥%។ អគ្គស្នងការរងនគរបាលជាតិបញ្ជាក់ទៀតថា ក្នុងនោះគ្រោះថ្នាក់ចរាចរណ៍កើតឡើងនៅពេលយប់ ៥៨% អ្នកស្លាប់ចំនួន៦១៣នាក់ ស្មើ៥៨% នៃអ្នកស្លាប់រួម ក្នុងនោះ អ្នកធ្វើដំណើរដោយម៉ូតូប្រមាណ ៦៣%។ ក្រៅពីនេះ សមត្ថកិច្ច បានបំពេញការងារជាច្រើនទៀត ដើម្បីលើកកម្ពស់សមត្ថភាព និងប្រសិទ្ធភាព ប្រតិបត្តិការរួមទាំងការផ្សព្វផ្សាយអប់រំជាសាធារណៈ តាមគ្រប់មធ្យោបាយ និងគ្រប់រូបភាព ការបង្កើនការយល់ដឹងអំពីច្បាប់ បច្ចេកទេស គោលការណ៍ វិធានការក្នុងការរឹតបន្តឹងការអនុវត្តច្បាប់ស្តីពី «ចរាចរណ៍ ផ្លូវគោក»៕