ឯកឧត្តម សេង ឈួន ដឹកនាំគណៈប្រតិភូចុះប្រកាសតែងតាំងប្រធាននិងមន្រ្តីស្ថានីយថ្លឹងយានយន្តដឹកជញ្ជូនលើសទម្ងន់កម្រិតកំណត់ ភ្នំពេញ ៖ នាថ្ងៃចន្ទ ទី១៥ ខែធ្នូ ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ អមដំណើរដោយ ឯកឧត្តម គឹម សាន់ ឯកឧត្តម ម៉ី ម៉ារ៉ាឌី អនុរដ្ឋលេខាធិការ លោកតាំង ពៅ ប្រធានលេខាធិការដ្ឋាន បានដឹកនាំគណៈប្រតិភូចុះប្រកាសតែងតាំងប្រធានស្ថានីយថ្មី ជំនួសមន្រ្តីរាជការដែលបានចូលនិវត្តន៍ នៅស្ថានីយជញ្ជីងអចល័តព្រែកហូរ និងមន្រ្តី១រូបទៀតនៅស្ថានីយជញ្ជីងអចល័ត ព្រែកឯង រាជធានីភ្នំពេញ ជំនួសមន្រ្តីដែលបានទទួលមរណភាព។ ឆ្លៀតក្នុងឱកាសនេះផងដែរ លោកប្រធានស្ថានីយ និងមន្រ្តីថ្មី បានប្តេជ្ញាចិត្តយ៉ាងមុតមាំក្នុងការទប់ស្កាត់បទល្មើសនៃការដឹកជញ្ជូនលើសទម្ងន់កម្រិតកំណត់អនុវត្តយ៉ាងត្រឹមត្រូវតាមច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តជាធរមាន ពង្រឹងសាមគ្គីភាពឱ្យកាន់តែល្អប្រសើរ ព្រមទាំងគោរពតាមការណែនាំរបស់ថ្នាក់ដឹកនាំ ដោយការយកចិត្តទុកដាក់ និងទទួលខុសត្រូវខ្ពស់បំផុត។ ថ្លែងក្នុងពិធី ឯកឧត្តមប្រធាន បានផ្តាំផ្ញើដល់លោកប្រធានស្ថានីយថ្មី ក៏ដូចជាមន្រ្តីទាំងអស់ ឱ្យខិតខំអនុវត្តការងារទប់ស្កាត់បទល្មើសដឹកជញ្ជូនលើសទម្ងន់ មានសាមគ្គីភាពផ្ទៃក្នុងល្អ កុំប្រព្រឹត្តសកម្មភាពអសកម្មមួយចំនួនក្នុងទីតាំងស្ថានីយ ដែលនាំឱ្យប៉ះពាល់ដល់កិត្តិយស ព្រមទាំងសេចក្តីថ្លៃថ្នូររបស់មន្រ្តីរាជការ និងត្រូវប្រកាន់ខ្ជាប់តួនាទីភារកិច្ចរៀងៗខ្លួនឱ្យបានត្រឹមត្រូវ ស្របតាមបទបញ្ញត្តិនៃច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តជាធរមាននៃព្រះរាជាណាចក្រកម្ពុជា៕