ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញដឹកនាំគណៈប្រតិភូក្រសួង ចូលរួមដាក់កម្រងផ្កាគោរពវិញ្ញាណក្ខន្ធសព ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន រាជធានីភ្នំពេញ៖ នាព្រឹកថ្ងៃព្រហស្បតិ៍ ទី៤ ខែធ្នូ ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចូលរួមដាក់កម្រងផ្កាគោរពវិញ្ញាណក្ខន្ធសព ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន ដែលបានទទួលមរណៈភាព នាថ្ងៃពុធ ទី៣ ខែធ្នូ ឆ្នាំ២០២៥ វេលាម៉ោង ២:៣៨នាទី រំលងអធ្រាត្រ ក្នុងជន្មាយុ ៧០ឆ្នាំ ដោយរោគាពាធ។ ស្ថិតក្នុងបរិយាកាសដ៏សែនក្រៀមក្រំនេះ ឯកឧត្តមរដ្ឋមន្ត្រី និងគណៈប្រតិភូអមដំណើរ បានចូលរួមរំលែកទុក្ខដោយសេចក្ដីសង្វេគជាទីបំផុតជាមួយ លោកជំទាវ ស៊ុន សុម៉ាលី និងក្រុមគ្រួសារ ចំពោះការបាត់បង់អ្នកជាទីគោរពស្រឡាញ់ និងបាត់បង់នូវឥស្សរជនមួយរូបរបស់ជាតិ ដែលបានខិតខំតស៊ូយកអស់កម្លាំង កាយចិត្ត និងប្រាជ្ញាស្មារតីចូលរួមបម្រើការងារជូនជាតិមាតុភូមិ ជាពិសេសនៅក្នុងវិស័យសាធារណការ និងដឹកជញ្ជូន ឱ្យទទួលបាននូវការអភិវឌ្ឍ និងរីកចម្រើនជាបន្តបន្ទាប់ ។ សូមឧទ្ទិសបួងសួងដល់ដួងវិញ្ញាណក្ខន្ធរបស់ ឯកឧត្តម កឹម បូរី សូមឱ្យបានសោយសុខក្នុងសុគតិភពកុំបីឃ្លៀងឃ្លាតឡើយ៕