ភ្នំពេញ៖ មកទល់បច្ចុប្បន្ន គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចការសាងសង់បានប្រមាណ ៥៣ភាគរយហើយ ខណៈរដ្ឋមន្ត្រីសាធារណការជំរុញក្រុមហ៊ុនឱ្យពន្លឿនបញ្ចប់គម្រោងមុនផែនការ។ តែយ៉ាងណាមិញស្ពាន គឺត្រូវតែធានាបាននូវគុណភាព និងសុវត្ថិភាព។ស្ពានឆ្លងកាត់ទន្លេបាសាក់នេះ មានទីតាំងភូមិសាស្ត្រខាងលិច ស្ថិតនៅសង្កាត់ចាក់អង្រែក្រោម ខណ្ឌមានជ័យ និងខាងកើតនៅសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។ បើតាមក្រសួងសាធារណការ និងដឹកជញ្ជូន គម្រោងនេះ មានតម្លៃ ៦០លានដុល្លារ ដែលកម្ពុជាបានពីកម្ចីរបស់រដ្ឋាភិបាលចិន និងសាងសង់ដោយក្រុមហ៊ុនសំណង់សៀងហៃ និងទីប្រឹក្សាគម្រោងដោយក្រុមហ៊ុនក្វាងចូវវ៉ានអាន។ស្ពាននេះ ត្រូវបានបើកការដ្ឋានសាងសង់នៅពាក់កណ្ដាលខែកុម្ភៈ ឆ្នាំ២០២៤ ដែលមានប្រវែង ៨៤៥,៧០ម៉ែត្រ, ទទឹង២៧ម៉ែត្រ, មាន ៤គន្លងសម្រាប់រថយន្ត, មាន២កន្លងសម្រាប់ម៉ូតូ និង ២គន្លងទៀតសម្រាប់ថ្មើរជើង។ នៅពេលសាងសង់រួច គម្រោងនេះ នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ភ្ជាប់ផ្លូវជាតិលេខ១ នៅខណ្ឌច្បារអំពៅ និងជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ ។ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍក្នុងតំបន់ផងដែរ៕