គណៈប្រតិភូកម្ពុជាអញ្ជើញចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ាន លើកទី៦០ និងកិច្ចប្រជុំពាក់ព័ន្ធជាមួយដៃគូសន្ទនានានា នៅទីក្រុងណៃពិដោ ប្រទេសមីយ៉ាន់ម៉ា មីយ៉ាន់ម៉ា៖ នាថ្ងៃចន្ទ ទី១៧ ខែវិច្ឆិកា ឆ្នាំ២០២៥ ឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានឧត្តមមន្រ្តីដឹកជញ្ជូនកម្ពុជា អញ្ជើញដឹកនាំគណៈប្រតិភូ នៃព្រះរាជាណាចក្រកម្ពុជា ចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ាន លើកទី៦០ តបតាមការអញ្ជើញរបស់ក្រសួងដឹកជញ្ជូន នៃប្រទេសមីយ៉ាន់ម៉ា ដែលជាប្រធានប្តូរវេនសម្រាប់ឆ្នាំ២០២៥ និងកិច្ចប្រជុំពាក់ព័ន្ធជាមួយដៃគូសន្ទនានានា នៅទីក្រុងណៃពិដោ ប្រទេសមីយ៉ាន់ម៉ា ដោយមានការអញ្ជើញអមដំណើរពីឯកឧត្ដម លោកជំទាវ ជាថ្នាក់ដឹកនាំនៃអគ្គនាយកដ្ឋានភស្តុភារ និងមន្ត្រីជំនាញពាក់ព័ន្ធ។ កិច្ចប្រជុំនេះត្រូវបានរៀបចំឡើងក្នុងគោលបំណង៖ (១) ពិនិត្យផែនការសកម្មភាពដែលបានអនុវត្តក្នុងឆ្នាំ២០២៥ និងអនុម័តផែនការសកម្មភាពសម្រាប់អនុវត្តនៅក្នុងឆ្នាំ២០២៦ ទាំងក្នុងក្របខណ្ឌអាស៊ាន និងក្នុងក្របខណ្ឌជាមួយដៃគូអភិវឌ្ឍន៍ (២) ពិនិត្យ ផ្តល់អនុសាសន៍ និងអនុម័តលើរបាយការណ៍ និងផែនការថ្មីៗរបស់ក្រុមការងារបច្ចេកទេសទាំងបួន គឺ ក្រុមការងារដឹកជញ្ជូនផ្លូវគោក ក្រុមការងារដឹកជញ្ជូនតាមផ្លូវសមុទ្រ ក្រុមការងារសម្របសម្រួលការងារដឹកជញ្ជូន និងក្រុមការងារដឹកជញ្ជូនផ្លូវអាកាស (៣) ពិនិត្យវឌ្ឍនភាព និងកំណត់ការងារបន្តជាមួយដៃគូសន្ទនា មានជាអាទិ៍ជាមួយប្រទេសចិន ជប៉ុន សាធារណរដ្ឋកូរ៉េ និងសហគមន៍អឺរ៉ុប និង (៤) ពិភាក្សាដើម្បីត្រៀមរៀបចំកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី៣១ និងកិច្ចប្រជុំរវាងរដ្ឋមន្រ្តីដឹកជញ្ជូនអាស៊ានជាមួយដៃគូរពាក់ព័ន្ធ នាថ្ងៃទី២០ ខែវិច្ឆិកា ឆ្នាំ២០២៥ ខាងមុខនេះ៕