កាលពីព្រឹកថ្ងៃព្រហស្បតិ៍ ១រោច ខែអស្សុជ ឆ្នាំច សំរិទ្ធិស័ក ព.ស. ២៥៦២ ត្រូវនឹងថ្ងៃទី២៥ ខែតុលា ឆ្នាំ២០១៨ វេលាម៉ោង ៨ និង៣០ នាទីព្រឹក នៅសាលប្រជុំក្រសួងសាធារណការ និងដឹកជញ្ជូនមានបើកកិច្ចប្រជុំពិភាក្សាអំពីការបង្កើនតម្លៃ Container Imbalance Charge (CIC) របស់ក្រុមហ៊ុននាវាមកលើវិស័យដឹកជញ្ជូនកម្ពុជា ក្រោមអធិបតីភាព ឯកឧត្តម ចាន់ តារា អគ្គនាយក នៃអគ្គនាយកដ្ឋានដឹកជញ្ជូន ផ្លូវទឹក ផ្លូវសមុទ្រ និងកំពង់ផែ។ កិច្ចប្រជុំពិភាក្សាប្រព្រឹត្តទៅដោយមានការស្នើឡើងពីប្រធានសមាគមភ្នាក់ងារបញ្ជូនទំនិញកម្ពុជា (CAMFA) ដោយសារតម្លៃ Container Imbalance Charge (CIC) មានការកើនឡើងជាលំដាប់ បើធៀបជាមួយប្រទេសជិតខាង និងប្រទេសក្នុងតំបន់អាស៊ីមួយចំនួនពុំមានតម្លៃ Container Imbalance Charge (CIC) នេះឡើយ។ សមាគមភ្នាក់ងារបញ្ជូនទំនិញកម្ពុជា មានការព្រួយបារម្ភចំពោះការតម្លើងថ្លៃនេះជារៀងរាល់ឆ្នាំដែលតម្លៃនេះជាប្រភេទថ្លៃដើមក្នុងស្រុក (Local Charges) នៃប្រទេសអ្នកនាំចូលទំនិញនឹងអាចធ្វើ ឱ្យមានផលប៉ះពាល់អវិជ្ជមានក្នុងការប្រកួតប្រជែងក្នុងតំបន់ និងអន្តរជាតិ ការឡើងថ្លៃទំនិញក្នុងស្រុក និងធ្វើឱ្យមានភាពមិនទុកចិត្តគ្នារវាងប្រតិបត្តិករក្នុងវិស័យដឹកជញ្ជូន ហើយអាចឈានដល់ការប្រកួតប្រជែងមិនស្មោះត្រង់។ ជាលទ្ធផលកិច្ចប្រជុំ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានស្នើឱ្យក្រុមហ៊ុននាវាពិចារណាលើការកំណត់តម្លៃ Container Imbalance Charge (CIC) ឱ្យនៅទាបបំផុត ឬ ដាក់ចូលក្នុងថ្លៃដឹកជញ្ជូនតាមផ្លូវសមុទ្រ (Ocean Freight) វិញ ស្នើឱ្យក្រុមហ៊ុននាវាកុំតម្លើងថ្លៃលើកដាក់ទំនិញនៅកំពង់ផែ Terminal Handling Charge (THC) ព្រោះកំពង់ផែបានកំណត់តម្លៃទាបលើសេវាកម្មនេះតាមរយៈគោលនយោបាយទាក់ទាញអ្នកវិនិយោគបរទេសរួចជាស្រេចទៅហើយ។