កិច្ចប្រជុំពិនិត្យពិភាក្សាលើការងារពង្រឹងគុណភាពកំណាត់ផ្លូវលេខ២៦០បេ៧អា នៅខេត្តក្រចេះ ទីស្ដីការក្រសួង៖ នាថ្ងៃអង្គារ ទី១១ ខែវិច្ឆិកា ឆ្នាំ២០២៥ ឯកឧត្តម នូ សុវត្ថិ រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យពិភាក្សាលើការងារពង្រឹងគុណភាពកំណាត់ផ្លូវលេខ២៦០បេ៧អា ប្រវែង ៥០,៧០គីឡូម៉ែត្រ នៅខេត្តក្រចេះ ជាមួយប្រតិភូក្រុមហ៊ុន K.P Cement Industry Co.,Ltd ដោយមានការចូលរួមពី ឯកឧត្តមអនុរដ្ឋលេខាធិការ លោកប្រធានមន្ទីរសាធារណការ និងដឹកជញ្ជូនខេត្តក្រចចេះ និងមន្ត្រីជំនាញពាក់ព័ន្ធផងដែរ។ កិច្ចប្រជុំនេះរៀបចំឡើងក្នុងបំណងដើម្បីពិនិត្យពិភាក្សាទៅលើបទបង្ហាញពាក់ព័ន្ធការងារពង្រឹងគុណភាពកំណាត់ផ្លូវលេខ២៦០បេ៧អា ទទឹង៦ម៉ែត្រ នៅខេត្តក្រចេះ ដើម្បីជាមូលដ្ឋាន និងព័ត៌មានច្បាស់លាស់ពាក់ព័ន្ធការងារបច្ចេកទេស ក៏ដូចជាបទដ្ឋានគតិយុត្តផ្សេងៗក្នុងការរៀបចំគម្រោងពង្រឹងគុណភាពកំណាត់ផ្លូវនេះឱ្យបានឆាប់រហ័ស សំដៅជួយសម្រួលដល់ការធ្វើដំណើររបស់ប្រជាពលរដ្ឋ ការដឹកជញ្ជូនឆ្លងកាត់ និងលើកកម្ពស់ដល់សេដ្ឋកិច្ចជាតិ៕