កិច្ចប្រជុំពិនិត្យវឌ្ឍនភាពការងារប្រចាំខែតុលា និងលើកទិសដៅការងារប្រចាំខែវិច្ឆិកា របស់អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ទីស្តីការក្រសួង៖ នាព្រឹកថ្ងៃសុក្រ ទី៣១ ខែតុលា ឆ្នាំ២០២៥ ឯកឧត្តម ឈួន វិន រដ្ឋលេខាធិការទទួលបន្ទុក បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារប្រចាំខែតុលា និងលើកទិសដៅការងារប្រចាំខែវិច្ឆិកា របស់អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដោយមានការចូលរួមពីឯកឧត្តមអនុរដ្ឋលេខាធិការ ថ្នាក់ដឹកនាំអគ្គនាយកដ្ឋាន និងថ្នាក់ដឹកនាំនាយកដ្ឋានចំណុះទាំង៣ ព្រមទាំងមន្ត្រីជំនាញពាក់ព័ន្ធជាច្រើនរូបផងដែរ។ កិច្ចប្រជុំនេះត្រូវបានរៀបចំឡើង ដើម្បីពិនិត្យពិភាក្សាលើវឌ្ឍនភាពការងារនូវផែនការសកម្មភាព ដែលអគ្គនាយកដ្ឋានដែលសម្រេចបាននៅក្នុងខែតុលា និងទិសដៅត្រូវបន្តអនុវត្តនៅខែវិច្ឆិកា និងពិភាក្សាពីកត្តាប្រឈមផ្សេងៗលើការអនុវត្តការងារកន្លងមក ដើម្បីស្វែងរកដំណោះស្រាយឱ្យបានទាន់ពេលវេលាប្រកបដោយប្រសិទ្ធភាព សំដៅជួយពង្រឹងការធ្វើផែនការសកម្មភាពរួម និងការបំពេញតួនាទីភារកិច្ចរបស់អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ឱ្យកាន់តែល្អប្រសើរថែមទៀត។ នាឱកាសនោះ ឯកឧត្តមរដ្ឋលេខាធិការ បានកោតសរសើរដល់ការខិតខំបំពេញការងារ និងលើកទឹកចិត្តដល់ថ្នាក់ដឹកនាំ និងមន្ត្រីទាំងអស់ នៃអគ្គនាយកដ្ឋាន សូមបំពេញការងារ និងតួនាទីភារកិច្ចបន្តទៀត ដើម្បីធ្វើយ៉ាងណាឱ្យសម្រេចបាននូវលទ្ធផលល្អ តាមផែនការដែលបានគ្រោងទុក របស់អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ៕