"យុវជនសូមជៀសឱ្យឆ្ងាយពីគ្រឿងញៀន និងត្រូវចូលរួមគោរពច្បាប់ស្តីពីចរាចរណ៍ផ្លូវគោក ទាំងអស់គ្នា" ជាការលើកឡើងរបស់ ឯកឧត្តម សេន ស៊ីហ៊ត់ រដ្ឋលេខាធិការ ក្នុងឱកាសចុះអប់រំផ្សព្វផ្សាយអំពីវិធីការពារទប់ស្កាត់ការចម្លងមេរោគអេដស៍ និងជំងឺអេដស៍ និងចូលរួមយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី១០ នៅមន្ទីរសាធារណការ និងដឹកជញ្ជូនខេត្តកំពង់ធំ និងខេត្តព្រះវិហារ។ នៅថ្ងៃទី២៧-២៨ ខែតុលា ឆ្នាំ២០២៥ ឯកឧត្តម សេន ស៊ីហ៊ត់ រដ្ឋលេខាធិការ និងប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន បន្ទាប់ពីទទួលបានការណែនាំដ៏ខ្ពង់ខ្ពស់ពី ឯកឧត្តម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានចុះអប់រំផ្សព្វផ្សាយអំពីវិធីការពារទប់ស្កាត់ការចម្លងមេរោគអេដស៍ និងជំងឺអេដស៍ និងផលប៉ះពាល់បណ្តាលមកពីការប្រើប្រាស់គ្រឿងញៀន និងការចូលរួមគោរពច្បាប់ស្តីពីចរាចរណ៍ផ្លូវគោក ដល់មន្ត្រីរាជការ បុគ្គលិក និងកម្មករ បម្រើការងារនៅមន្ទីរសាធារណការ និងដឹកជញ្ជូនខេត្តកំពង់ធំ និងខេត្តព្រះវិហារ។ ក្នុងដំណើរបេសកកម្មចុះផ្សព្វផ្សាយនេះ មានការអញ្ជើញចូលរួមពី ឯកឧត្តមអនុរដ្ឋលេខាធិការ រួមទាំងក្រុមការងារពាក់ព័ន្ធមកពីអង្គភាពក្រោមឱវាទក្រសួង និង ថ្នាក់ដឹកនាំ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន នៃខេត្តទាំងពីរ បានចូលរួមផងដែរ។ គោលបំណងនៃការចុះផ្សព្វផ្សាយនេះ គឺធ្វើឡើងដេីម្បីជាការក្រើនរំឮកដល់ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន នៃខេត្តនីមួយៗ ក្នុងការចូលរួម ការពារទប់ស្កាត់ការចម្លងមេរោគអេដស៍ និងជំងឺអេដស៍ ជៀសផុតពីការប្រើប្រាស់គ្រឿងញៀន និងជាការពញ្ញាក់ស្មារតីអោយមានការប្រុងប្រយ័ត្នបានខ្ពស់ ចំពោះបញ្ហាការធ្វើដំណើរទៅគ្រប់ទីកន្លែង មានស្មារតីទទួលខុសត្រូវ រក្សាសុខសុវត្ថិភាព ជាចំណែកក្នុងការចូលរួមកាត់បន្ថយគ្រោះថ្នាក់ចរាចរណ៍ ទាំងអស់គ្នា។ ថ្លែងក្នុងឱកាសនោះដែរ ឯកឧត្តមរដ្ឋលេខាធិការ បានថ្លែងអំណរគុណ និងបានពាំនាំនូវប្រសាសន៍ផ្តាំផ្ញើសួរសុខទុក្ខពី ឯកឧត្តមរដ្ឋមន្ត្រី ប៉េង ពោធិ៍នា ដល់ ថ្នាក់ដឹកនាំ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន ទាំងពីរ ដែលតែងខិតខំយកចិត្តទុកដាក់ក្នុងការបំពេញកិច្ចការងារ។ ជាមួយគ្នានេះដែរ ឯកឧត្តមរដ្ឋលេខាធិការ បានអំពាវនាវ សូមឱ្យមានការចូលរួមគោរពអនុវត្តទាំងអស់គ្នា គឺត្រូវជៀសឱ្យឆ្ងាយពីគ្រឿងញៀន ចូលរួមការពារទប់ស្កាត់ការចម្លងមេរោគអេដស៍ និងជំងឺអេដស៍ និងត្រូវគោរពច្បាប់ស្តីពីចរាចរណ៍ផ្លូវគោក គ្រប់ៗគ្នា។ សូមបញ្ជាក់ថានៅឆ្នាំ២០២៤ មានការឆ្លងមេរោគអេដស៍ថ្មី នៃក្រុមយុវវ័យ ដែលមានអាយុពី១៥ឆ្នាំ ទៅ២៤ឆ្នាំ ចំនួន ១ ២០០នាក់ មានការកើនឡើង ដោយសារខ្វះការស្វែងយល់អំពីហានិភ័យនៃមេរោគអេដស៍ និងជំងឺអេដស៍ រួមទាំងការថយចុះក្នុងការប្រើប្រាស់ស្រោមអនាម័យ៥០% ក្នុងចំណោមប្រជាជនគន្លឹះ និងក្រុមយុវវ័យ។ យោងរបាយការណ៍ប្រចាំឆមាសទី១ ឆ្នាំ២០២៥ របស់អាជ្ញាធរជាតិប្រយុទ្ធ និងជំងឺអេដស៍ បង្ហាញចំនួនប៉ាន់ស្មានអ្នករស់នៅជាមួយមេរោគអេដស៍ ៧៦ ០០០នាក់ អ្នកផ្ទុកមេរោគអេដស៍ បានទទួលព្យាបាលដោយឱសថប្រឆាំងមេរោគអេដស៍ ចំនួន ៧១ ១៥៧នាក់ នៅតាមសេវាព្យាបាល ៧៤កន្លែងទូទាំងប្រទេស និងបានទទួលបណ្ណមូលនិធិសមធម៌សុខាភិបាល (ម.ស.ស) ចំនួន ៥០ ៦៧៣នាក់ ស្មើ ប្រមាណ ៧១,២១% នៅមូលដ្ឋានសុខាភិបាល ៧១ទីតាំង ទូទាំង២៥រាជធានី-ខេត្ត។ ជាមួយនោះដែរតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ប្រចាំនព្វមាស (៩ខែ) ឆ្នាំ២០២៥ ទិន្នន័យនៃអ្នកញៀនគ្រឿងញៀន ចំនួន ២៩ ៣៧០នាក់។ ចំពោះបញ្ហាគ្រោះថ្នាក់ចរាចរណ៍ តែងតែកើតឡើងនៅលើដងផ្លូវ ជាមធ្យម ស្លាប់ ៤នាក់ និងរបួសធ្ងន់ ស្រាល ប្រមាណ១០នាក់ ជារៀងរាល់ថ្ងៃ៕