ភ្នំពេញ ៖ ឯកឧត្តម សេន ស៊ីហ៊ត់ រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន បានមានប្រសាសន៍ថា ការអនុវត្តកិច្ចការងារមានប្រសិទ្ធភាព ត្រូវជៀសឱ្យឆ្ងាយពីគ្រឿងញៀន មានសុខភាពល្អ និងមានសុវត្ថិភាពក្នុងការធ្វើដំណើរពេលចុះបំពេញការងារ។ ក្នុងពិធីចុះអប់រំផ្សព្វផ្សាយអំពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី១០ ឆ្នាំ២០២៥ និងវិធីការពារទប់ស្កាត់ការចម្លងមេរោគអេដស៍ និងជំងឺអេដស៍ និងការចូលរួមគោរពច្បាប់ស្តីពីចរាចរណ៍ផ្លូវគោក នៅមន្ទីរសាធារណការនិងដឹកជញ្ជូន រាជធានីភ្នំពេញនិងខេត្តកណ្តាល ឯកឧត្តម សេន ស៊ីហ៊ត់ បានថ្លែងអំណរគុណនិងផ្តល់នូវមតិចែករំលែកថា ការអនុវត្តកិច្ចការងារប្រកបដោយប្រសិទ្ធភាព ត្រូវតែជៀសឱ្យឆ្ងាយពីគ្រឿងញៀន ត្រូវមានសុខភាពល្អ និងមានសុខសុវត្ថិភាពក្នុងការធ្វើដំណើរ នៅពេលចុះបំពេញការងារ។ ឯកឧត្តម បានអំពាវនាវ ឱ្យមានការចូលរួមគោរពអនុវត្តទាំងអស់គ្នា គឺត្រូវចូលរួមទប់ស្កាត់ការប្រើប្រាស់និងត្រូវជៀសឱ្យឆ្ងាយពីគ្រឿងញៀន ចូលរួមការពារការចម្លងមេរោគអេដស៍ និងជំងឺអេដស៍ និងត្រូវគោរពច្បាប់ស្តីពីចរាចរណ៍ផ្លូវគោក ឱ្យបានគ្រប់ៗគ្នា។ សូមជម្រាបថា ក្រោមកិច្ចសហការជាមួយអាជ្ញាធរជាតិប្រយុទ្ធនឹងជំងឺអេដស៍ និងអង្គការមូលនិធិថែទាំសុខភាពអ្នកជំងឺអេដស៍ (AHF) ការចុះផ្សព្វផ្សាយនេះ គឺធ្វើឡើងដើម្បីជាការក្រើនរំឮកដល់ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន នៃខេត្តនីមួយៗ ក្នុងការចូលរួម ការពារទប់ស្កាត់ការចម្លងមេរោគអេដស៍ និងជំងឺអេដស៍ ជៀសផុតពីការប្រើប្រាស់គ្រឿងញៀន និងជាការពញ្ញាក់ស្មារតីអោយមានការប្រុងប្រយ័ត្នបានខ្ពស់ ចំពោះបញ្ហាការធ្វើដំណើរទៅគ្រប់ទីកន្លែង មានស្មារតីទទួលខុសត្រូវ រក្សាសុខសុវត្ថិភាព ជាចំណែកក្នុងការចូលរួមកាត់បន្ថយគ្រោះថ្នាក់ចរាចរណ៍ ទាំងអស់គ្នា៕