សិក្ខាសាលាផ្សព្វផ្សាយ និងចែករំលែកចំណេះដឹងពាក់ព័ន្ធការងារបរិស្ថាន និងសង្គម សម្រាប់វិស័យសាធារណការ និងដឹកជញ្ជូន ភ្នំពេញ៖ នាថ្ងៃព្រហស្បតិ៍ ទី៩ ខែតុលា ឆ្នាំ២០២៥ ឯកឧត្ដម ខាន់ ម៉ាណេរ រដ្ឋលេខាធិការ តំណាងដ៏ខ្ពងខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីសិក្ខាសាលាផ្សព្វផ្សាយ និងចែករំលែកចំណេះដឹងពាក់ព័ន្ធការងារបរិស្ថាន និងសង្គម សម្រាប់វិស័យសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំ មន្រ្តីរាជការក្រសួង និងតំណាងមន្ទីរសាធារណការ និងដឹកជញ្ជូន ទាំង២៥ រាជធានី ខេត្ត។ សិក្ខាសាលាត្រូវបានរៀបចំឡើង ក្នុងគោលបំណងធ្វើការផ្សព្វផ្សាយ ចែករំលែក និងលើកកម្ពស់ចំណេះដឹងពាក់ព័ន្ធក្របខ័ណ្ឌ បរិស្ថាន និងសង្គមដែលនឹងមានប្រធានបទពាក់ព័ន្ធចំនួន៦ រួមមាន៖ ១). ការអនុវត្តស្ដង់ដារ បរិស្ថាន និងសង្គម ២). ការគ្រប់គ្រងបរិស្ថាន និងសង្គម អំឡុងពេលសាងសង់ ៣). ការណែនាំ និងរៀបចំផែនការគ្រប់គ្រងបរិស្ថាន និងសង្គម ៤). វិធីសាស្រ្តក្នុងការចុះត្រួតពិនិត្យ និងតាមដាន ការអនុវត្តកិច្ចគាំពារបរិស្ថាន និងសង្គមនៅការដ្ឋាន ៥). យន្តការបណ្ដឹងតវ៉ា ការកត់ត្រា និងដំណោះ ស្រាយបណ្ដឹងតវ៉ា ៦). មធ្យោបាយដែលអាចធ្វើទៅបាននៃការអនុវត្តប្រកបដោយប្រសិទ្ធភាព និងការអភិវឌ្ឍសមត្ថភាពបន្ថែមដល់មន្រ្តីពាក់ព័ន្ធការងារបរិស្ថាន និងសង្គម សម្រាប់វិស័យហេដ្ឋារចនាសម្ព័ន្ធ និងដឹកជញ្ជូន ឱ្យបានទូលំទូលាយជូនមន្រ្តីមកពីគ្រប់អង្គភាពក្រោមឱវាទក្រសួង ដែលជាសមិទ្ធផលដ៏មានសារៈសំខាន់ថ្មីមួយទៀត សម្រាប់គ្រប់អង្គភាពក្រោមឱវាទក្រសួងយកទៅ អនុវត្តនាពេលខាងមុខឱ្យមានសង្គតិភាព ប្រសិទ្ធភាព ស័ក្តិសិទ្ធិភាព និងគណនេយ្យភាព ឆ្លើយតបទៅ នឹងយុទ្ធសាស្រ្តបញ្ចកោណដំណាក់កាលទី១ ផែនការយុទ្ធសាស្រ្តអភិវឌ្ឍន៍ជាតិ ឬគោលនយោបាយ និងផែនការយុទ្ធសាស្រ្តអភិវឌ្ឍន៍វិស័យសាធារណការ និងដឹកជញ្ជូន សំដៅធ្វើយ៉ាងណាធានាឱ្យបាននូវការអនុវត្តមួយដែលជោគជ័យស្របតាមចក្ខុវិស័យរបស់រាជរដ្ឋាភិបាលកម្ពុជា។ ឯកឧត្ដមរដ្ឋលេខាធិការ មានប្រសាសន៍ថា សិក្ខាសាលានាពេលនេះបានកំណត់នូវមេរៀន បទពិសោធន៍ និងការអនុវត្តល្អៗ ដែលជាចំណែកនៃធាតុចូលយ៉ាងសំខាន់ ក្នុងការលើកកម្ពស់ចំណេះដឹង និងសមត្ថភាពបន្ថែម ដល់មន្រ្តីពាក់ព័ន្ធការងារបរិស្ថាន និងសង្គម សម្រាប់វិស័យហេដ្ឋារចនាសម្ព័ន្ធ និងដឹកជញ្ជូន សម្រាប់អនុវត្តគម្រោងប្រើប្រាស់ថវិកាជាតិនិងអន្តរជាតិ រួមជាមួយនឹងគោលបំណង និងការរំពឹងទុក នៃសិក្ខាសាលានាថ្ងៃនេះនូវចំណេះដឹង និងបទពិសោធន៍ ធ្វើជាមូលដ្ឋានមួយក្នុងការរួមចំណែកគ្រប់គ្រងការងារការដ្ឋាន គ្រប់គ្រងការបំពុល ធ្វើឱ្យប្រសើរឡើនូវសុខុមាលភាព សុវត្ថិភាពបុគ្គលិក កម្មករ និងសហគមន៍ កាត់បន្ថយហានិភ័យ និងផលប៉ះពាល់នានាក្នុងបរិស្ថានរស់នៅជុំវិញរបស់ប្រជាពលរដ្ឋ៕