ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាលបច្ចេកទេស ស្ដីពីការពិសោធដីសម្រាប់តួផ្លូវ ទីស្ដីការក្រសួង៖ នាថ្ងៃព្រហស្បតិ៍ ទី៩ ខែតុលា ឆ្នាំ២០២៥ ឯកឧត្តមបណ្ឌិត យិត បុណ្ណា រដ្ឋលេខាធិការ តំណាងដ៏ខ្ពងខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីបើកវគ្គបណ្តុះបណ្តាល ស្ដីពីការពិសោធដីសម្រាបតួផ្លូវ មានរយៈពេល ៣ថ្ងៃ (វគ្គទ្រឹស្ដី ១ថ្ងៃ និងអនុវត្ត ២ថ្ងៃ) ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង សិក្ខាកាមមកពីនាយកដ្ឋានអនុវត្តគម្រោងថ្នាក់កណ្ដាលរបស់ក្រសួងសាធារណការ និងដឹកជញ្ជូន មន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត អង្គភាពវិស្វកម្ម ចំនួន ២៩អង្គភាព ព្រមទាំងក្រុមហ៊ុនឯកជនចំនួន ៦ក្រុមហ៊ុន ដែលអនុវត្តគម្រោងស្ថិតក្រោមអាណាប័កក្រសួងសាធារណការ និងដឹកជញ្ជូន។ វគ្គបណ្តុះបណ្តាលនេះរៀបចំឡើងក្នុងគោលបំណងចម្បង ដើម្បីឱ្យអ្នកបច្ចេកទេសទទួលបន្ទុកការងារពិសោធន៍ នៅតាមបណ្ដាអង្គភាពអនុវត្តគម្រោង ទាំងអង្គភាពរដ្ឋ និងវិស័យឯកជនទាំងអស់ យល់ដឹងឱ្យបានកាន់តែច្បាស់ អំពីការពិសោធគុណភាពសម្ភារសំណង់ ដែលយកមកប្រើប្រាស់សម្រាប់ការងារហេដ្ឋារចនាសម្ព័ន្ធផ្លូវថ្នល់ ជាពិសេសអនុឡោមតាមវិធីពិសោធន៍សំណង់សាធារណការ ដែលក្រសួងទើបនឹងបានធ្វើបច្ចុប្បន្នភាពរួមគ្នា រវាងក្រុមការងារបច្ចេកទេសក្រសួង ជាមួយក្រុមអ្នកជំនាញការ P4I (Partnership for Infrastructure) និង AustRoads ក្រោមជំនួយឥតសំណងពីរដ្ឋាភិបាលនៃប្រទេសអូស្ត្រាលី ដែលបានដាក់ឱ្យប្រើប្រាស់កាលពីដើមខែមីនា ឆ្នាំ២០២៥ កន្លងទៅនេះ។ សិក្ខាកាមទាំងអស់នឹងទទួលបានការយល់ដឹង ទាំងផ្នែកទ្រឹស្ដី និងការអនុវត្តផ្ទាល់ពីលក្ខណៈទូទៅអំពីដីសម្រាប់ផ្លូវថ្នល់ និងការជ្រើសរើសសំណាក ការពិសោធបរិមាណសំណើមដី ការពិសោធរបាយទំហំគ្រាប់របស់ដី ការពិសោធលីមីត នៃភាពរាវ លីមីតនៃភាពស្អិត និងសន្ទស្សន៍ភាពស្អិតរបស់ដី ការចាត់ចំណាត់ថ្នាក់ដី ការពិសោធ បង្ហាប់ដី និងការពិសោធ CBR របស់ដីបង្ហាប់នៅមន្ទីរពិសោធន៍ដោយមិនត្រាំទឹក និងត្រាំទឹក។ ថ្លែងក្នុងពិធី ឯកឧត្តមបណ្ឌិត យិត បុណ្ណា រដ្ឋលេខាធិការ តំណាងដ៏ខ្ពងខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា បើទោះបីជាមានបទដ្ឋានបច្ចេកទេស គ្រឿងចក្រ ដែលមានអានុភាព និងទំនើប ការប្រើប្រាស់វិធីសាស្ត្រសាងសង់ដែលត្រឹមត្រូវក៏ដោយ ប៉ុន្តែការជ្រើសរើសសម្ភារៈសម្រាប់សាងសង់សំណង់ហេដ្ឋារចនាសម្ព័ន្ធផ្លូវថ្នល់ ក៏ជាកត្តាដ៏សំខាន់មួយផងដែរ ជាក់ស្ដែងសម្ភារដី គឺជាសមាសធាតុដ៏សំខាន់បំផុតមួយ ក្នុងការសាងសង់គ្រឹះផ្លូវ ដែលតម្រូវឱ្យមានការពិសោធ និងវាយតម្លៃគុណភាពយ៉ាងហ្មត់ចត់ មុននឹងយកមកសាងសង់ ដើម្បីឱ្យផ្លូវមានគុណភាពប្រើប្រាស់បានយូរអង្វែង ជាពិសេសការបង្កើនភាពធន់ទៅនឹងការប្រែប្រួលអាកាសធាតុ។ វគ្គបណ្ដុះបណ្ដាលក្នុងថ្ងៃនេះ សិក្ខាកាមទាំងអស់ នឹងទទួលបាននូវពុទ្ធិបន្ថែមពីសារៈសំខាន់ នៃការពិសោធ និងការប្រើប្រាស់សម្ភារៈដីសម្រាប់តួថ្នល់ ដែលយើងធ្លាប់បានប្រើប្រាស់កន្លងមក ដើម្បីធានាបាននូវប្រសិទ្ធភាព និងគុណភាពក្នុងការអភិវឌ្ឍហេដ្ឋារចនាសម្ព័ន្ធផ្លូវថ្នល់ក្នុងព្រះរាជាណាចក្រកម្ពុជា។ ជាចុងបញ្ចប់ ឯកឧត្តមរដ្ឋលេខាធិការ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំក្រសួង អគ្គនាយកដ្ឋានបច្ចេកទេស ព្រមទាំងមន្ត្រីបច្ចេកទេសពាក់ព័ន្ធ ដែលបានយកចិត្តទុកដាក់ចូលរួមអនុវត្តការងាររបស់ក្រសួងនារយៈពេលកន្លងមក ជាពិសេសបានចូលរួមសហការគ្នារៀបចំវគ្គបណ្តុះបណ្តាល និងផ្សព្វផ្សាយបទដ្ឋានបច្ចេកទេសនេះឡើង និងសូមឱ្យ សិក្ខាកាមចូលរួមលើកជាមតិយោបល់ សួរនាំ និងធ្វើការស្វែងយល់ពីចំណុចនីមួយៗឱ្យកាន់តែស៊ីជម្រៅ ដើម្បីធានាថាក្រោយពីបញ្ចប់វគ្គបណ្តុះបណ្តាលនេះ យើងនឹងមានលទ្ធភាពក្នុងការអនុវត្តលើការងារពិសោធន៍ និងការជ្រើសរើសសម្ភារសំណង់ ប្រកបដោយភាពច្បាស់លាស់ ដោយអនុលោមតាមបទដ្ឋានបច្ចេកទេសរបស់ក្រសួង៕