(ភ្នំពេញ)៖ នៅព្រឹកថ្ងៃទី៧ ខែតុលា ឆ្នាំ២០២៥នេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបសម្តែងការគួរសម និងពិភាក្សាការងារ ជាមួយលោក Datuk Dr. Abdul Rahman Junaidi អនុរដ្ឋមន្ត្រីនៃទីស្ដីការអភិបាល នៃរដ្ឋសហព័ន្ធសារ៉ាវ៉ាក់ និងប្រតិភូ ក្រោមការសម្របសម្រួលពីលោកបណ្ឌិត អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស។ ជំនួបនេះធ្វើឡើង ដើម្បីស្វែងយល់ពីឱកាសវិនិយោគក្នុងវិស័យហេដ្ឋារចនាសម្ព័ន្ធដឹកជញ្ជូន ជាពិសេសក្នុងការដឹកជញ្ជូនតាមផ្លូវទឹក សមុទ្រ កំពង់ផែ ព្រមទាំងគម្រោងសក្តានុពលផ្សេងៗ រវាងភាគីទាំពីរ។ ជាកិច្ចចាប់ផ្តើមនៃជំនួប លោករដ្ឋមន្ត្រីបានសម្តែងការស្វាគមន៍យ៉ាងកក់ក្តៅចំពោះគណៈប្រតិភូ ដែលអញ្ជើញមកសិក្សាវិនិយោគលើវិស័យសំខាន់ៗនៅកម្ពុជា និងបានចូលរួមអបអរសាទរខួបលើកទី៦៦ នៃការបង្កើតទំនាក់ទំនងការទូតកម្ពុជា-ម៉ាឡេស៊ីនៅឆ្នាំនេះ ហើយប្រទេសទាំងពីរពិតជាមានចំណងមិត្តភាពជិតស្និទ្ធ និងកិច្ចសហប្រតិបត្តិការដ៏រឹងមាំជាមួយគ្នា។ រដ្ឋមន្ត្រីបានបន្តថា វត្តមានរបស់ គណៈប្រតិភូនាពេលនេះ មិនត្រឹមតែពង្រឹងទំនាក់ទំនងទ្វេភាគីទាំងពីរប៉ុណ្ណោះទេ ប៉ុន្តែថែមទាំងបើកឱកាសថ្មីមួយសម្រាប់ការពង្រឹងវិស័យហេដ្ឋារចនាសម្ព័ន្ធដឹកជញ្ជូន របស់កម្ពុជាផងដែរ។ លោករដ្ឋមន្ត្រី ក៏បានរៀបរាប់អំពីវឌ្ឍនភាពការងារ និងការរីកចម្រើនវិស័យហេដ្ឋារចនាសម្ព័ន្ធដឹកជញ្ជូននៅកម្ពុជា ជូនប្រតិភូផងដែរ ហើយសង្ឈឹមថា ដំណើរទស្សនកិច្ចនេះ នឹងបើកឱកាសឲ្យភាគីទាំងពីរអាចធ្វើសហប្រតិបត្តិរវាងគ្នា ពិសេសទាក់ទងនឹងវិស័យកសិកម្ម ពាណិជ្ជកម្ម និងការដឹកជញ្ជូនរវាងប្រទេសទាំងពីរ។លោក Datuk Dr. Abdul Rahman Junaidi បានថ្លែងថា ជំនួបនេះផ្តោតសំខាន់លើការសិក្សាស្វែងយល់វិនិយោគលើវិស័យកំពង់ផែ ខណៈនៅក្នុងរដ្ឋសហព័ន្ធសារ៉ាវ៉ាក់មានកំពង់ផែធំៗចំនួន ៦ ក្នុងនោះ មានកំពង់ផែមួយដែលមានសក្តានុពលធ្វើកិច្ចសហការជាមួយកម្ពុជា នោះគឺកំពង់ផែអន្តរជាតិ Bintulu ដែលជាផ្លូវនាវាដឹកជញ្ជូនដែលអាចតភ្ជាប់រវាងកម្ពុជា និងរដ្ឋសារ៉ាវ៉ាក់។ Bintulu គឺជាកំពង់ផែដ៏ធំជាងគេនៅក្នុងរដ្ឋសារ៉ាវ៉ាក់ និងជាប់ចំណាត់ថ្នាក់លេខ៣ ក្នុងចំណោម កំពង់ផែម៉ាឡេស៊ី សម្រាប់ឆ្នាំ ២០២៤ និងជាស្ថានីយនាំចេញផលិតផលប្រេងដូងដ៏ធំបំផុតរបស់ម៉ាឡេស៊ី ព្រមទាំងមានសមត្ថភាព ដឹកជញ្ជូនទំហំទំនិញសរុប ប្រហែល ៥២លានតោនក្នុងមួយឆ្នាំៗ។ លោកបានជម្រាបដែរថា នឹងអញ្ជើញទស្សនកិច្ចទៅកំពង់ផែ ខេត្តកំពត ថ្ងៃស្អែកផងដែរ។ សូមជម្រាបថា រដ្ឋសហព័ន្ធសារ៉ាវ៉ាក់ ជាដែនដីកោះផ្នែកមួយរបស់ម៉ាឡេស៊ី មានប្រជាជនរស់នៅប្រមាណជិត៣ លាននាក់ ដែលជាទឹកដីដែលសម្បូរដោយធនធានធម្មជាតិ មានទាំងប្រេង និងឧស្ម័ន៕