ខេត្តព្រៃវែង៖ ស្ថានភាពទឹកជំនន់បានស្រកចុះ តែកម្លាំងទឹកបានបន្តបុកទម្លុះច្រោះតួផ្លូវខេត្តលេខ ៣៨៣បេចំនួនពីរកន្លែងទៀត អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងថា នៅព្រឹកថ្ងៃទី៧ ខែតុលា ឆ្នាំ២០២៥នេះ ស្ថានភាពទឹកជំនន់បានស្រកចុះ៣តឹក(ធៀបនឹងម្សិលម៉ិញ) ខណៈដែលទឹកនៅបានបន្តបុកទម្លុះច្រោះតួផ្លូវខេត្តលេខ ៣៨៣បេចំនួនពីរកន្លែងទៀតនៅក្បែរនោះ។ អាជ្ញាធរនៅបន្តបិទចរាចរណ៍ជាបណ្តោះអាសន្នលើកំណាត់ផ្លូវខេត្តលេខ ៣៨៣បេ ត្រង់ចំណុចគ.ម០៤+០០០ ដល់ចំណុចគ.ម១០+៤២៥ ចាប់ពីភូមិតាំងស្នាយ ឃុំរកា ដល់ភូមិមេសរប្រចាន់ ឃុំមេសរប្រចាន់ ស្រុកពារាំង ខេត្តព្រៃវែង។ មន្ទីរសារធារណការ និងដឹកជញ្ជូនខេត្តព្រៃវែង បន្តតាមដានការវិវត្តស្ថានភាពនោះ ដើម្បីអន្តរាគមន៍ជួយប្រជាពលរដ្ឋឱ្យបានទាន់ពេលវេលា៕